A rôh trâm mâ, pôa Tô Lâm, Kăn xiâm pơkuâ hnê cheăng Đảng tối Việt Nam đi đo nhoăm tơrŭm cheăng ƀă Kyrgyzstan. Kăn xiâm pơkuâ hnê cheăng  Đảng  tối, luâ 3 chât hơnăm, tơrŭm cheăng kal kí - tơpui kâ châ mơnhông, tơrŭm cheăng kâ - tê mơdró pơla péa tơnêi têa hiăng hlo mơnhông tơƀrê, la ối hên tơdroăng pêi pro hâi kêi, púi vâ mơdêk tâ nếo tơrŭm cheăng péa pâ tung tâi tâng mâu kơvâ cheăng ing tơdroăng tơpui tơno kĭ tơhrâ pơla péa pâ xúa ai pơxúa mâu tơdroăng ki tơ’lêi hlâu ki Khu tơrŭm tê mơdró tơniăn pơla Việt Nam ƀă Khu tơrŭm cheăng kâ Á- Âu; péa tơnêi têa kô pơtối rak vế tơdjêp tơrŭm a kơpong Trung Á ƀă ASEAN.

Tung la ngiâ, péa ngế kăn xiâm vâ môi tuăn tiah kố, péa tơnêi têa ai hên tơmeăm khoăng vâ mơdêk tơrŭm cheăng pơla péa pâ ing tơdroăng pơxúa tŭm péa; tối nhên kal mơdêk trâm mâ a  rêm râ, ing tâi tâng mâu bâng pơla péa pâ ƀă tơpui hên troăng, Đảng, Kuô̆k hô̆i vâ mơdêk loi nhoăm tơdroăng kal kí; mơdêk mơjiâng mâu luât tơrŭm cheăng pơla rêm pâ, kơvâ cheăng a kong pơlê.