Tung hơnăm hdrối, mâu kăn tung khu hiăng séa ngăn, tơkŭm tâi tâng vâ séa ngăn tơ’nôm, po ngăn a mâu hlá mơ-éa chêh ‘na tơdroăng pơtroh ăm hneăng hôp má 14 dêi Đảng, tung mê, ai tơdroăng kal ‘na pơkâ mơnhông cheăng kâ pơla hơnăm 2026-2030 vâ pêi châ 2 kơxô̆; Tơdrêng amê cho mâu tơdroăng kal ki ê ‘na lêng, kring tơniăn, tơpui kâ; mâu tơdroăng ‘na luât, ƀă tơdroăng cheăng hbrâ mơdât kâ kơluâ.

Mơgêi hneăng hôp, pôa Tô Lâm, Kăn xiâm pơkuâ hnê cheăng Đảng  vâ môi tuăn ƀă tơdroăng dêi Khu kăn mâu khu, pakĭng mê tối pơchân ‘na tâi tâng pơtối tơmâng xo mâu tơdroăng a rôh hôp vâ ‘mâi hơ’lêh, tơ’nôm mâu tơdroăng chêh tung hlá mơ-éa tơbleăng chêh ‘nâng ‘nâi.

Kăn xiâm pơkuâ hnê cheăng Đảng pơkâ thế, mâu tơdroăng chêh nhên tơbleăng thế chêh tiô troăng pêi pro ƀă tơbleăng pêi tơdrêng hlối vâ mâu khu râ kuăn pơlê, kăn ƀô̆ đảng viên hlo nhên pơkâ pêi cho xiâm ƀă pêi kô châ tơƀrê. Kăn xiâm pơkuâ hnê cheăng Đảng xuân pơkâ thế, mâu Tơdroăng chêh vâ tối tơbleăng thế tối tro khât, ai mâu troăng hơlâ tro vâ tơbleăng pêi, pôi tá mơdêk hnoăng cheăng la pôi tá tơngôu.