Tơpui mơgêi rôh hôp, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa, Kăn pơkuâ Đảng lêng Tơnêi têa tơmâng xo, mơnhên tối khât klêi kơ’nâi pêi pro châ tơƀrê tung hneăng má III, tung mê Đảng lêng Tơnêi têa hiăng pơkuâ tâi tâng lêng pêi pro kơtăng tơdroăng pơkuâ, hnê mơhno dêi Đảng, Tơnêi têa, mơnhông khôi hmâ khên tơnôu ƀă túa rêh ối lĕm “Mố đô̆i Pôa Hồ”, tơrŭm, mơ-eăm tơkâ luâ xơpá, tơbleăng pêi pro tŭm mâu hnoăng cheăng lêng, gâk kring.

Tối nhên, hneăng má IV cho rôh ki ai pơxúa khât pơkâ troh tơdroăng ki pêi pro klêi hnoăng cheăng hơnăm 2026, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế Đảng lêng Tơnêi têa kal tơkŭm pơkuâ hnê mơhno tơbleăng pêi mâu troăng hơlâ, khŏm mơ-eăm pêi pro tŭm mâu tơdroăng pơkâ pêi, hnoăng cheăng hơnăm 2026 ƀă tơdroăng ki rơkê má môi.

Pơtối pơkuâ tâi tâng lêng hbrâ rơnáu, ƀĕng ƀeăn, ‘nâi nhên, tơbleăng hdrối, mơnhên tối tro tơdroăng, pêi pro klêi rơkê tơdroăng cheăng tí tăng ‘nâi plĕng ăm Đảng, Tơnêi têa tơdroăng ki tŏng gum rơkê ƀĕng, ƀlêi chiâng mâu tơdroăng, vâ pôi rtá tro kơdrâ, malối cho mâu tơdroăng cheăng tung la ngiâ, tơdroăng a tíu tơkăng kong, têa kơxĭ, chuăn rơlố, tơdroăng tung măng.