Veăng ai mâ ai pôa Lê Minh Hưng, Ngế pro xiâm hnê ngăn tơnêi têa, pôa Trần Cẩm Tú, Phŏ kăn pơkuâ Khu hnê mơhno; ngế ki ai mâ đi đo dêi Khu kăn pơkuâ ngăn Đảng, phŏ pơkuâ Khu hnê mơhno rơtế ƀă mâu ngế cheăng. A rôh hôp, mâu kăn tơpui tơno, ăm rơkong veăng tơpui ‘na 6 tơdroăng ki kal, mê cho: séa ngăn taia tâng mâu hlá mơéa pơkâ ‘na luât; tơdroăng pơkâ pêi tung la ngiâ chêh pro klêi troăng hơlâ luât Việt Nam tung chal nếo; mơdêk tơƀrê khu tơrŭm pêi pro luât ƀă mơdêk tơdroăng ki rơkê tung pêi pro; ‘mâi rơnêu Ƀô̆ luât Hình sự ƀă Luât Tơrŭm kơ koan séa ngăn tơdroăng xôi; troăng hơlâ pơxâu phâk mâu tơdroăng xôi liăn ngân ƀă tơleăng tơxup tơbriât kuăn pơlê.

Tơpui hnê mơhno, pôa Tô Lâm, kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên, cheăng mơjiâng ƀă pêi pro luât cho troăng hơlâ veăng gum lêi tah mâu tíu ki tro kreăng, kơdroh liăn ngân ‘no hrê pêi pro, pro phuâng liăn ngân, rak tơniăn hnoăng ƀă pơxúa tơtro luât ăm kuăn pơlê, khu mơdró kâ, pro ivá mơnhông cheăng kâ rêh ối pơlê pơla, rak vế krá rơdêi cheăng lêng, gâk kring.