Klêi kơ’nâi leh tơdah, pôa Tô Lâm, kăn xiâm pơkuâ hnê ngăn cheăng Đảng ƀă pôa Thongloun Sisoulith, kăn xiâm pơkuâ hnê ngăn cheăng Đảng, Kăn xiâm hnê ngăn kong têa Lếo rơtế ƀă khu râ kăn xiâm péa tơnêi têa hôp tơpui tơno mâu troăng pơkâ pêi ƀă troăng hơlâ vâ pơtối mơdêk tơrŭm cheăng Việt Nam – Lếo mơnhông troh a ‘ngêi nếo tung la ngiâ.

Tơpui pơxiâm po hôp, pôa Tô Lâm, Kăn xiâm pơkuâ hnê ngăn cheăng Đảng tối rơdêi, Đảng, Tơnêi têa ƀă kuăn pơlê Việt Nam phiu ro tơdah kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa Lếo rơtế ƀă kơdrâi pôa ƀă Khu râ kăn xiâm pôu râ Tơnêi têa troh Việt Nam; tối nhên kố cho kăn pơkuâ kong têa ê ki apoăng pôu Việt Nam klêi kơ’nâi hneăng hôp khu kăn lâp tơnêi têa rôh XIV dêi Đảng Kŏng san Việt Nam, mơhno tơdroăng nhuô̆m ó khât ƀă hiâm mơno lĕm tro dêi Đảng, Tơnêi têa Lếo xuân môi tiah ngế krê kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa Lếo ƀă Việt Nam.

Peăng tơná, pôa Lào Thongloun Sisoulith - Kăn xiâm pơkuâ hnê ngăn cheăng Đảng, Kăn xiâm hnê ngăn kong têa Lếo rơkâu ƀlêi chiâng Hneăng hôp XIV dêi Đảng Kŏng san Việt Nam, hlối rơkâu pôa Tô Lâm, kăn xiâm pơkuâ hnê ngăn cheăng Đảng pơtối châ Hneăng hôp pôk pro kăn xiâm pơkuâ hnê ngăn xiâm Đảng hneăng XIV.