Pôa Thongloun Sisoulith rơkâu ƀă tối nhên xua tơdroăng pơkuâ rơkê plĕng dêi Đảng Kŏng san Việt Nam, tung plâ 95 hơnăm hdrối ƀă malối 80 hơnăm mơjiâng tơnêi têa, Việt Nam hiăng châ tơƀrê hên tơdroăng, mơnhông tŭm têk ‘na pơhlêh nếo, tơniăn kal kí, mơnhông cheăng kâ rĕng ƀă krá, po rơdâ tơrŭm tơpui kâ, hnoăng cheăng ƀă tíu ối a kong têa ê dêi Việt Nam ôh tá pơtê châ mơnhông a kơpong ƀă a kong têa ê; ăm hlo kố cho ƀai hriâm ki kơnía vâ Lếo mơ-eăm, mơnhông ƀă mơjiâng tơnêi têa.

Péa ngế kăn pơkuâ tối rơdêi pơtối mơnhông tơrŭm, po rơdâ mot tơrŭm ƀă kong têa ê, rak tơniăn gâk kring, mơnhông cheăng kâ ƀă ki pơxúa dêi kuăn pơlê péa tơnêi têa. Tung ivá khôi hmâ ki kơnía git, péa tơnêi têa kô thăm mơnhông tơrŭm tung kơpong ƀă a kong têa ê, xua hơniâp lĕm, tơniăn, tơrŭm cheăng ƀă mơnhông tung kơpong ƀă a kong têa ê.