Tơpui a rôh leh, Kăn xiâm pơkuâ hnê ngăn cheăng Đảng tối rơdêi, Pác Bó – Trường Hà ôh ti xê cho môi tíu ki xối tơbâ, mê ối cho tíu ki tĭng dêi hiâm mơno mơ-eăm vâ tơniăn, mơ-eăm xêh ƀă rơhêng vâ mơ-eăm dêi hdroâng mơngế Việt Nam. Xua mê, tơdroăng ki ‘no liăn pro môi to hngêi trung hdroâng kuăn ngo ai tíu kâ koi ối pơtê akố mơhno trâu rơdâ tơdroăng tơmâng ngăn dêi Đảng, Tơnêi têa ƀă tơdroăng cheăng hnê hriâm ƀă hnê mơjiâng tuăn ngoâ rơkê, vâ pơhlêh tơdroăng hriâm tâp ăm hok tro kơpong tíu tơkăng kong, pro kơdroh kơtăn hơngế dêi mâu kơpong tơnêi têa, veăng gum ‘mâi mơnhông cheăng lêng – gâk kring ƀă thăm mơnhông cheăng kâ rêh ối pơlê pơla kơpong tíu tơkăng kong Tơnêi têa.

Kăn xiâm pơkuâ hnê ngăn cheăng Đảng ăm ‘nâi, tung la ngiâ ah kô ai hên tơdroăng pơxiâm pro, mơdêk rĕng tơdroăng ki pro 248 toăng hngêi trung a 248 to cheăm tơkăng kong a tơnêi, ƀă hneăng ki apoăng cho 100 toăng hngêi trung hdroâng kuăn ngo ai tíu kâ koi ối pơtê péa râ (Râ má môi ƀă Râ má péa) a mâu cheăm tơkăng kong vâ tŏng gum tơdroăng hriâm tâp ai tŭm tơdroăng ăm kuăn muăn kuăn, cháu chái  pơlê hdroâng kuăn ngo kơpong tơkăng kong.