Kơxo lơ 13/10, a Pơlê kong xiâm Hà Nội, Hneăng hôp Khu kăn Đảng ƀô̆ Chin phuh rôh má Môi, hơnăm 2025-2030 păng ‘nâng châ po. Pôa Tô Lâm, Kăn xiâm pơkuâ hnê ngăn cheăng Đảng veăng hôp ƀă Hnê mơhno a Hneăng hôp. Teăng mâ Khu xiâm pơkuâ tơdroăng kal kí, Khu pơkuâ ngăn Đảng, Kăn xiâm pơkuâ hnê ngăn cheăng Đảng khĕn kơdeăn mâu tơdroăng ki pêi pro châ tơƀrê dêi Đảng ƀô̆ Chin phuh hiăng pêi châ tung pơla hneăng hdrối 2020-2025, malối cho tung pơkuâ, hnê mơhno pơkuâ hnoăng cheăng mơjiâng troăng hơlâ, mơnhông cheăng kâ rêh ối pơlê pơla, hbrâ mơdât pơreăng tâ tú ƀă tơniăn tơdroăng rêh kâ ối ăm kuăn pơlê.

Kăn xiâm pơkuâ hnê ngăn cheăng Đảng tối nhên, Đảng Chin phuh athế pơtối cho ngế ki djâ troăng ahdrối ‘na ivá khên tơnôu cheăng kal kí, tuăn ngoâ rơkê, túa rêh ối ƀă pơhlêh nếo tơmiât pêi rơkê”; cho tíu xiâm tơdroăng tơrŭm, môi tuăn ƀă pêi pro tung tâi tâng kơ koan cheăng tơnêi têa. Pôa pơkâ thế mơjiâng Đảng ƀô̆ cho krúa lĕm khât, krá rơdêi; khŏm mơ-eăm hbrâ mơdât kâ kơluâ kâ kơhveăm liăn ngân; mơdêk hnoăng cheăng Chin phuh; pro tơdroăng mơnhông, tơdrăng, pêi pro, gum Kuăn pơlê”.

*Xông tơpui pơxiâm po Hneăng hôp Kăn teăng mâ Đảng ƀô̆ Chin phuh roh má Môi, pôa Phạm Minh Chính, Kăn pơkuâ Đảng ủi Chin phuh, Ngế pro xiâm hnê ngăn Chin phuh tối rơdêi, Hneăng hôp cho tơdroăng ki kal khât, mơnhên troăng prôk tung tơdroăng mơjiâng Chin phuh tơdrăng lĕm, mơjiâng, pêi pro, xua tơnêi têa, xua kuăn pơlê. Hneăng hôp châ pơkâ troh hơnăm 2030, Việt Nam chiâng tơnêi têa dế mơnhông mơdêk ai kơmăi kơmok rơxông nếo, pêi lo liăn tơdâng hên, ối tung khu 30 kong têa cheăng kâ ki kân GDP kân má môi lâp plâi tơnêi.

Tơtêk cheăng kâ hneăng hơnăm 2026 – 2030 thế rĕng, krá tơniăn, rak tơdâng tơ’mô kân. Hneăng hôp pơkâ 10 hnoăng cheăng, troăng pêi ki xiâm, tơkŭm pêi kêi đeăng troăng pơkâ pêi, tah lôi ivá mơjiâng pro, mơhnhôk tâi tâng mơngế cheăng, mơjiâng ivá nếo ăm mơnhông tơtêk; mơdêk kơmăi kơmok tiô rơxông nếo; ngăn khoa hok kŏng ngê̆, pơhlêh nếo tơmiât pêi rơkê ƀă pơhlêh xúa kŏng ngê̆ cho tơdroăng ki mơnhông hôm; mơjiâng tơdroăng hnê hriâm tiô rơxông nếo, mơjiâng mơngế pêi cheăng ki rơkê.