Pôa Tô Lâm, Kăn xiâm pơkuâ hnê ngăn Đảng rơkâu mâu hnoăng hiăng châ pêi ki kân, tŭm tơdroăng dêi Sinuâ hiăng pêi châ tơƀrê ing kơ’nâi Hneăng hôp má 20 troh nôkô; tối Việt Nam môi tuăn ngăn mơnhông tơrŭm cheăng ƀă Sinuâ cho tơdroăng pơkâ ki kân, rah xo tiô troăng hơlâ ki má môi tung tuât pơkâ tơpui kâ tơniăn krê, pơkuâ dêi, hên troăng pêi pro, hên tơdroăng pơ’lêh dêi Việt Nam.

Tối nhên, Quảng Tây cho kong pơlê ki hmâ achê ƀă Việt Nam, Kăn xiâm pơkuâ hnê ngăn Đảng khĕn kơdeăn hnoăng cheăng, tơdroăng pêi pro ki ahdrối dêi Quảng Tây tung mơdêk tơrŭm cheăng, tơrŭm pơxúa  khât ƀă Việt Nam. ‘Na tơrŭm tung la ngiâ, Kăn xiâm pơkuâ hnê ngăn Đảng pơkâ thế Quảng Tây ƀă mâu kong pơlê Việt Nam tơmâng ngăn tơdroăng ki hlê plĕng tơdjuôm mâu kăn, mơdêk trâm mâ tơpui tơno, hlê plĕng dêi rơpó; tơbleăng pêi tơƀrê tơrŭm cheăng ai pơxúa tung mâu kơvâ cheăng, malối cho chăng kâ - tê mơdró, mơjiâng tơmeăm khoăng, khoa hok kơmăi kơmok, pơ’lêh nếo, tuăn ngôa rơkê AI...