Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên Việt Nam đi đo nhuô̆m tơrŭm cheăng tiô khôi vâi krâ nah ƀă Tơrŭm cheăng ton xŏn tâi tâng ƀă Rusi, ngăn Rusi cho môi tung mâu khu tơrŭm cheăng ki kal má môi tung troăng hơlâ tơpui kâ dêi Việt Nam.

Việt Nam đi đo chôu vế ƀă nhuô̆m tơdroăng tŏng kum, tŏng veăng kân kĭn, khên tơnôu dêi kuăn pơlê Liên Xô hdrối nah ƀă kuăn pơlê Rusi nôkố ƀă tơdroăng tơplâ tơleăng lĕm hdroâng mơngế, pro tơnêi têa tơrŭm chiâng môi, xuân môi tiah mơjiâng ƀă kring vế Tơnêi têa. Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tơrŭm cheăng Việt Nam ƀă Rusi hiăng châ pơloăng mơnúa ing ton nah ƀă mâu tơdroăng ki pơ'lêh dêi tơdroăng tung lâp plâi tơnêi, chiâng tơmeăm tơdjuôm kơnía git dêi péa hdroâng mơngế.

Việt Nam pói vâ péa pâ pơtối rak vế, mơnhông tơdroăng ki lĕm tro, tơdrêng amê hlối tơ'nôm mâu tơdroăng ki tơrŭm cheăng nếo, tơtro ƀă tơdroăng ki rơhêng vâ mơnhông tung hneăng nôkố.