Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Khu pơkuâ Kŏng an kuăn pơlê hneăng hdrối rêm râ cho hngêi tơdjuôm, tơrŭm tuăn pâ, tơrŭm môi tuăn; tơmâng rak ngăn ivá, tơdroăng rêh ối kế tơmeăm khoăng, hiâm mơno, malối ƀă mâu ngế ki ai tơdroăng rêh ối pá puât.

Khu kal mơnhông hnoăng cheăng xiâm tung tơdroăng tâi tâng kuăn pơlê gâk kring Tơnêi têa; tơrŭm ƀă khu Kŏng an ƀă khu kăn pơkuâ pơlê cheăm pơkuâ, hnê mơhno mâu ngế ki tơ'lêi ôh tá tơniăn 'na gâk kring, tơniăn; tơdrêng amê pro kông tơdjêp djâ troăng hơlâ, luât dêi Đảng ƀă Tơnêi têa troh ƀă kuăn pơlê. Kăn xiâm pơkuâ hnê ngăn Đảng, Kăn xiâm hnê ngăn tơnêi têa xuân pơkâ thế Khu tơmâng ngăn hnê hriâm khôi túa vâi krâ nah pâ nhuô̆m tơnêi têa, chuh ngiah khên tơnôu kăch măng ƀă khôi túa lĕm tro dêi Kŏng an kuăn pơlê ăm rơxông ối nếo; mơnhông tơdroăng loi tơngah, ki rơkê plĕng dêi mâu rơxông Kŏng an tung mơjiâng tơdroăng rêh ối mơhno khôi túa lĕm tro, rak vế tơniăn gâk kring, tơniăn a tíu ối. Khu xiâm Kŏng an ƀă Vi ƀan xiâm Măt trâ̆n Tơnêi têa Việt Nam châ pơkâ thế hriăn ngăn, pơkâ troăng hơlâ tơtro vâ Khu pêi pro tro hnoăng cheăng châ Đảng, Tơnêi têa pơcháu.