Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tơdroăng pơtâng tối thế pơxiâm ing tơdroăng ki ai khât, tung mê tơdroăng tối tơbleăng 'na rêh ối pơlê pơla thế troh a tíu ki ai hnoăng pơkuâ ƀă mơdêk tơleăng mơnhên tơdroăng. Thế mơjiâng troăng pêi sap ing tơmâng, séa ngăn, mơnhên, pơtroh tro ăm kơ koan troh tơleăng, tiâ mơnhên ƀă séa ngăn tơdroăng châ tơƀrê; tơdroăng tơpui 'na tuăn tơmiât, tơdroăng rêh ối pơlê pơla thế châ mot tung tơdroăng pơkâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế djâ tơdroăng tơmâng ƀă tơpui tối leăng tung tâi tâng tơdroăng mơjiâng, tơbleăng ƀă pêi pro troăng hơlâ; tơpui tối leăng troăng hơlâ thế tiô tơdroăng ki ai khât, tơdroăng ki tơdrăng, tơbleăng tŭm tơdroăng ki tơ'lêi hlâu, pá puât ƀă tơdjâk. Kơ koan mơjiâng troăng hơlâ thế pôu râng hnoăng cheăng 'na ki dâi lĕm troăng hơlâ, tơkŭm pêi pro, tơdrêng amê hlối hbrâ tơpui tối leăng, tơmâng xo rơkong tơpui tối.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa xuân pơkâ thế mâu kơ koan chêh hlá tơbeăng ki xiâm mơdêk ki rơkê plĕng tơpui tối leăng, tí tăng 'nâi plĕng, châ hlo tơdroăng ƀă thăm mơdêk tơdroăng châ achê ƀă kuăn pơlê, malối cho mâu hơnăm ối nếo.