Tơpui a rôh pêi cheăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tung pơla hdrối kố nah, mơhé kơxô̆ tơdroăng xôi, tơdroăng xôi kân, xôi kŭn tâk, tơdroăng rế hía rế ôh tá tơniăn, mâu khu râ kăn pơkuâ hnê ngăn cheăng Đảng, khu tơrŭm cheăng Đảng ƀă kơ koan tơleăng hiăng ai hên tơdroăng ki mơ-eăm pêi cheăng vâ châ tơƀrê. La, tơdroăng tơleăng tơdroăng xôi kân, xôi kŭn tá hâi châ tơleăng klêi.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế mơdêk tơdroăng pơkuâ dêi Đảng ƀă tơdroăng hbrâ mơdât, tơleăng mâu tơdroăng tơxup tơbriât pơla kuăn pơlê, tơdroăng cheăng kal kí ƀă tơdroăng pro mơ-éa. Tơdrêng amê thế pơtối pê klêi tơdâng tơ'mô luât, tơniăn hnoăng dêi kuăn pơlê châ rak vế đi đo sap ing hbrâ mơdât tơdroăng tơxup tơbriât troh pro mơ-éa,'mâi rơnêu mâu tơdroăng pơkâ ki ôh tá kal khât kô chiâng pro mơdon hâi khế tơleăng.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa  pâ thế mâu kơ koan thâ tơkŭm pêi mâu tơdroăng cheăng ki tơdjâk troh; tơdroăng cheăng hiăng nhên thế pêi hlối, tơdroăng cheăng ki lâi ối tơvâ tơvân thế hriĕn tăng troăng lêi tâh, ôh tá pơklât thế ngế ki ê pêi, ôh tá tơkôm dêi rơpó. Tơrêm tơdroăng cheăng thế ‘nâi nhên cơ koan pơkuâ, kơ koan tơrŭm, tơmeăm pê lo, tơdroăng pêi pro vâ rĕng klêi.