A rôh trâm mâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng tối 4 tơdroăng ki xiâm, mê cho: Athế hlê plĕng tro 'na ki pơxúa dêi pơkâ rah xo inâi ƀă hnoăng cheăng dêi kăn ƀô̆ tung pơkâ rah xo inâi; Athế hbrâ rơnáu ki rơkê khât dêi khu kăn ƀô̆ pơkâ rah xo inâi Khu pơkuâ hnê ngăn Đảng tung hneăng ki nếo. Kơlo ki má mơ'nui thế cho tơmeăm khoăng, tơdroăng châ tơƀrê, ki tơdjâk, ki loi tơngah ƀă ki pơxúa ăm kuăn pơlê; Khŏm hơ'lêh nếo tơdroăng pơkuâ ngăn, hriâm pât ƀă xúa kăn ƀô̆ klêi kơ'nâi rah xo.

Pôa tối nhên tơdroăng pro tíu ăm kăn ƀô̆ khên tơmiât, khên pêi, khên pôu râng dêi hnoăng cheăng. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên tơdroăng hbrâ mơngế pêi cheăng hâi kố cho hbrâ ivá pơkuâ dêi Đảng ăm mâu hneăng mơnhông nếo. Pơkâ cho tơdroăng ki hbrâ, hriâm tâp, séa mơnhên ƀă rah xo; ôh tá xê hbrâ "tíu ối" ăm kăn ƀô̆ pơkuâ.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên: hnoăng cheăng cho tơdroăng ki xing xoăng dêi khu tơrŭm; hnoăng pơkuâ cho tơdroăng ki pơcháu vâ pêi cheăng ăm tơnêi têa ƀă Kuăn pơlê; inâi, hnoăng cheăng ƀă tơdroăng ki rơkê plĕng xua rêm ngế mơjiâng. Tơdroăng ki lĕm ƀă ivá cheăng dêi kăn ƀô̆ athế châ mơnhên tung tơdroăng ki ai khât, ƀă tơdroăng ki xúa hnoăng pơkuâ, ƀă tơdroăng ki pêi cheăng ƀă ƀă tơdroăng ki loi tơngah dêi kăn ƀô̆, đảng viên ƀă Kuăn pơlê.