Kố cho rôh pôu ki apoăng dêi kăn xiâm Việt Nam troh a New Zealand klêi kơ’nâi péa tơnêi têa păng ‘nâng mơdêk tơrŭm cheăng pơla péa pâ tâk troh Tơnêi têa tơrŭm cheăng tung la ngiâ Tŭm têk a hơnăm 2025 drêng tơbâ 50 hơnăm mơjiâng tơrŭm cheăng, tung pơla tơrŭm cheăng péa tơnêi têa dế pơtối mơnhông tơƀrê hôm, tơniăn ngăn tung tơdroăng ki loi tơngah tơdroăng cheăng kal kí ƀă hiâm mơno loi tung tơdroăng cheăng la ngiâ pơla péa tơnêi têa rế hía rế châ ‘mâi mơnhông.

Rôh lăm pôu kố cho mơnhên troăng hơlâ môi tuăn dêi Việt Nam ngăn nhuô̆m tơrŭm cheăng ƀă New Zealand – môi tơnêi têa ki hmâ achê, ai hên tơdroăng ki ai hlâu tơ’lêi tung mơnhông cheăng kâ-rêh ối a kơpong peăng Hdroh Thái Bình Dương, tơdrêng amê hlối cho troăng hdró ki kal ăm tơrŭm cheăng tung la ngoâ tŭm têk pơla Việt Nam ƀă New Zealand mơnhông rơdêi, ai pơxúa ƀă tơƀrê tâ nếo tung hneăng ki nếo.

Tiô tối hdrối tung 2 hâi, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa kô tơpui tơno ƀă jâ Cindy Kiro, ngế ki pơkuâ hnoăng cheăng tâi tâng dêi New Zealand; tơpui tơno ƀă pôa Christopher Luoxon, Ngế pro xiâm hnê ngăn kong têa; tơpui ƀă kăn xiâm hnê ngăn Kuô̆k hô̆i New Zealand; veăng ai mâ ƀă tơpui a Rôh hôp Hnê hriâm đăi hok ƀă Hnê cheăng pêi Việt Nam – New Zealand; Trâm mâu kăn ƀô̆, mâu ngế cheăng kăn teăng mâ ƀă kuăn pơlê Việt Nam a New Zealand.