A ngiâ um Pôa Hồ Chí Minh, Kăn xiâm hnê ngăn tơnêi têa hneăng apoăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơtế mâu kăn teăng mâ hiăng tu dêi ko têk nhang mơhno hiâm mơno pâ mơnê trâu hơngế ƀă Pôa Hồ Chí Minh, Kăn xiâm hnê ngăn tơnêi têa hneăng apoăng, Kăn xiâm ki kân krip má môi dêi kuăn pơlê Việt Nam; ngế pêi cheăng ki rơkê dêi tơdroăng pêi cheăng tiô troăng kŏng san ƀă kŏng nhân lâp plâi tơnêi.

Pôa Hồ hiăng pleăng hnoăng cheăng, pleăng tâi rơxông ăm tơdroăng cheăng tơleăng lĕm hdrông mơngế, xông tơplâ vâ châ tơleăng lĕm ƀă hơniâp ro dêi hdrông mơngế Việt Nam ƀă kuăn pơlê lâp plâi tơnêi. Mâu tơmeăm rôh ton nah, ‘noăng chư chêh, tơmeăm rôh nah dế châ mơđah tơbleăng a Kơpong tíu chôu ‘măn tơmeăm khoăng rôh ton nah Pôa Hồ Chí Minh a Tíu pêi cheăng Kăn xiâm hnê ngăn tơnêi têa cho mâu tơdroăng ki vâ mơnhên ai tiah hlo ƀă mâ ƀă păng ‘nâng, mơhno tơdroăng rêh ối, tơdroăng pêi cheăng, troăng ihiâm mơno ƀă troăng pêi cheăng dêi Pôa Hồ.

Nôkố, mâu ‘noăng chư chêh, tơmeăm ‘na Pôa Hồ tíu kố xuân châ rak i lĕm, gum ăm kơdrâm kuăn pơlê châ ngăn, hriăn plĕng, hriâm tâp ‘na tơdroăng rêh ối, tơdroăng pêi cheăng, ihiâm mơno troăng tơmiât, ihiâm mơno lĕm ƀă troăng pêi cheăng dêi Pôa Hồ Chí Minh.