A rôh tơdah, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, Việt Nam đi đo nhoăm tơrŭm cheăng ƀă ASEAN, ngăn ASEAN cho rơpŏng hngêi ki kân hmâ achê ƀă cho mâu pơlê pơla kong têa ki achê hnối hmâ. Khĕn kơdeăn mâu hnoăng pêi pro dêi ASEAN tung mâu hơnăm kô hía nah, Kăn xiâm pơkuâ hnê ngăn Đảng, Kăn xiâm hnê ngăn tơnêi têa  tối loi ngah khât mâu kong têa tung khu kô pơtối rak hnoăng cheăng ki tơrŭm, pơtối rak vế hnoăng pêi pro ki kal, mơjiâng pro klêi Khu kong têa ASEAN hơnăm 2045.

Pakĭng mê tối nhên, tung pơla lâp plâi tơnêi dế pơ‘lêh rĕng ƀă xuân trâm ki pá puât tung mâu kong têa ASEAN, xua mê, kal mơdêk loi nhoăm kal kí, mơdêk ivá cheăng, po rơdâ tơrŭm cheăng kâ, tê mơdró, ‘no liăn cheăng, kơdroh ki kơtăn hơngế ‘na mơnhông tơƀrê pơla mâu kong têa tung khu. Teăng mâ mâu Kăn hnê ngăn ASEAN tối, kô pơtối tơrŭm krá kâk tâ nếo ƀă Việt Nam, veăng mơjiâng khu kong têa ASEAN tơrŭm krá khât dêi rơpó, pêi cheăng rơkê ƀeăn, hriê̆n plĕng ki nếo ƀă xo kuăn pơlê cho ngế ki pro xiâm.