Tơbleăng troăng hơlâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối ăm 'nâi, Đảng ƀă Tơnêi têa Việt Nam pơkâ pêi pro môi tuăn troăng hơlâ tơpui kâ tơniăn krê, pơkuâ xêh, mơ-eăm xêh, hên troăng, hên túa. Hlối púi vâ tơrŭm krá tâ nếo ƀă mâu kong têa, tung mê mơnhên ai Mih cho môi tung mâu khu tơrŭm cheăng ki kal má môi.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế péa tơnêi têa rak trak ki tơrŭm cheăng, pro xiâm tơdroăng kal kí tơniăn, ton xŏn khât tơxâng ƀă tơdroăng tơrŭm cheăng tung la ngiâ tŭm têk pơla péa tơnêi têa. Pakĭng mê, púi vâ mơdêk pêi tơƀrê mâu luât tơpui tơno, tối tơdrăng ƀă Mih ‘na mâu tơdroăng péa pâ  rơtế vâ ‘nâi plĕng, mơ-eăm tơleăng mơnhên klêi mâu tơdroăng  ki ê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, Việt Nam vâ rơtế ƀă Mih pơtối mơnhông tơrŭm cheăng tung tŭm tơdroăng pơla péa tơnêi têa rế xông tơbrê trâu tâ, khât tâ ing tơdroăng nhoăm dêi rơpó, rơtế ai pơxúa.