Tơpui tơno ƀă vâi krâ kuăn pơlê, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa phiu ro châ trâm pơlê pơla mơngế Việt Nam a New Zealand rơtế kăn teăng mâ kuăn pơlê ing mâu kong têa rơlố Nam Thái Bình Dương. Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối ăm ‘nâi, rôh lăm pôu pêi cheăng rôh kố troh a New Zealand vâ pơtối mơdêk tơrŭm cheăng pơla Việt Nam ƀă New Zealand rế hía rế prôk trâu hơngế châ tơƀrê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pói vâ kuăn pơlê ki rêh ối a kong têa ê pơtối mơdêk tuăn ihiâm mơno tơrŭm môi tuăn, tơdjuôm ivá vâ mơjiâng môi pơlê pơla mơnhông mơdêk krá tơniăn, đi đo mơdêk hiâm mơno hâk tơngăm hdrông mơngế, tơmiât troh pơlê xiâm, tơnêi têa ƀă tơbêng ăm tơrŭm nhŏng o pơla Việt Nam ƀă New Zealand xuân môi tiah ƀă mâu kong têa rơlố rế hía rế mơnhông mơdêk.