Kơxo hâi lơ 21/9, tiô chôu tơnêi têa, a pơlê kong kân New York, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa  rơtế ƀă mâu kăn xiâm Việt Nam trâm mâ mâu ngế rơkê ƀă sinh viên Việt Nam a Mih. Dâng 40 ngế kăn teăng mâ pêi cheăng ‘na tuăn ngôa rơkê, rak ngăn tơdroăng chêh tung kơmăi, tơƀai ôh tá ai ngế vê, hriăn pro tơmeăm tung phần mềm, luât pơkâ tŏng gum, hnê hriâm ƀă luât lâp plâi tơnêi veăng hôp trâm mâ.

Mâu Ngế rơkê pâ thế hên troăng hơlâ vâ mơdêk hnoăng cheăng pêi dêi Việt Nam tung ki pơxúa tuăn ngôa rơkê kuăn mơngế pro tung lâp plâi tơnêi,  hlối tơdjêp ƀă mâu ngế rơkê Việt Nam ki rêh ối a kong têa ê ƀă tung tơnêi têa. Tối tơbleăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa khĕn kơdeăn khât mâu tơdroăng veăng hnê tối tá hiâm mơno, tối nhên; tối rơdêi tơdroăng pơkâ thế pro hlâu vâ mâu khu cheăng ‘na khoa hok tăng ‘nâi plĕng, hriăn pêi pro ƀă veăng ‘no hnoăng mơnhông tơnêi têa.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối tiah kố mơngế Việt Nam rêh ối a kong têa ê cho môi khu ôh tá tơklâ dêi hdroâng mơngế Việt Nam ƀă cho xiâm ki kal. Mâu kơ koan tung tơnêi têa kal thế hbrâ tơmâng, kếo mâu ngế rơkê veăng ing apoăng tung mơjiâng luât pơkâ, tŏng gum, veăng tăng ‘nâi plĕng ƀă tơdroăng hnê mơhriâm, ing mê, pơtối rak ki tơbrê tâ xiâm mơngế rơkê dêi Việt Nam ki reh ối a kong têa ê.