A rôh trâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa loi tơngah tơdroăng mơnhông mơdêk tơniăn dêi Australia ôh tá xê to djâ tơniăn ăm kuăn pơlê Australia, ăm tơrŭm cheăng Việt Nam – Australia mê ối veăng gum ăm hơniâp lĕm, tơniăn ƀă kro mơdrŏng dêi kơpong ƀă lâp plâi tơnêi.

Tơpui tơno ‘na tơrŭm cheăng pơla péa tơnêi têa, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối rơdêi Australia cho ngế pú hmâ, khu ki loi tơngah, ai hên pơxúa ton xŏn tơdâng ƀă Việt Nam. Việt Nam nhuô̆m tơdroăng rơtế môi tuăn ƀă tŏng gum dêi Australia tung tơdroăng mơnhông mơdêk tơnêi têa, tơdrêng amê pói vâ djâ tơrŭm péa tơnêi têa rế hía rế prôk trâu hơngế, păng ‘nâng ƀă châ tơƀrê.

‘Na troăng tơrŭm cheăng, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế péa tơnêi têa pơtối pro krá tơniăn loi tơngah kal kí ing tơpui tơno râ kăn xiâm ƀă mâu ƀâng tơrŭm cheăng; po rơdâ tơrŭm gâk kring tơnêi têa - kring tơniăn; mơdêk tê mơdró, mơ’no liăn cheăng, tơmiât troh pơkâ pêi lo liăn péa pâ 20 rơtal dollars ƀă tâk rơdêi mơ’no liăn pơla péa pâ.