Tơdroăng tơkêa bro vâ rế hía rế 'mâi mơnhông tíu xiâm dêi Hoàng thành Thăng Long, tơdrêng amê rak vế ƀă mơnhông mâu tơdroăng ki kơnâ ton nah, túa lĕm tro dêi Tíu tơbâ lâp plâi tơnêi. Điện Kính Thiên cho tíu ki xiâm dêi Cấm thành Thăng Long. Kố cho tíu xiâm pơkuâ ƀă tíu ki tơkŭm po leh kân, cho tíu ki tơkŭm po tơdroăng leh kân, tơdah kăn teăng mâ, cho tơdroăng ki mơhno ki kân má môi dêi hnoăng pơkuâ tơnêi têa Đại Việt sap chal 15 - 18.

Troăng hơlâ 'mâi mơnhông châ mơjiâng ing 15 hơnăm hriăn plĕng hên kơvâ 'na tơdroăng ton nah, hriăn plĕng 'na tơmeăm khoăng ton nah, hriăn plĕng 'na mơjiâng pro ƀă tơmeăm khoăng ki kơnía, rơtế ƀă tơdroăng ki veăng hnê tối dêi UNESCO ƀă ICOMOS. Pơlê kong kân Hà Nội pơkâ thế tung pơla rak vế, 'mâi rơnêu, 'mâi mơnhông athế ngăn tiô kơ tơdroăng ki rơkê plĕng khoa hok, ngăn tiô kơ mâu tơdroăng ki xiâm ƀă rak vế tơniăn mâu tơmeăm khoăng ki hiăng châ hlo.

Tơdroăng tơkêa bro châ mơnhên cho hvêa chêng prôk ki apoăng kal khât tung tơdroăng ki pêi pro tiô tơdroăng ki vâ 'mâi mơnhông tíu xiâm dêi Pơlê kong xiâm Thăng Long troh hơnăm 2035, veăng kum djâ mâu tơdroăng ki kơnía troh achê tâ ƀă kuăn pơlê ƀă tơmối.