Teăng mâ Kăn xiâm Đảng, Tơnêi têa, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng diâp Pơkâ dêi Kuô̆k hô̆i ‘na tơdroăng mơjiâng Pơlê kong kân Đồng Nai ƀă diâp Mê dai Pêi cheăng ối má Môi ăm Đảng ƀô̆, mâu kăn ƀă kuăn pơlê dêi pơlê kong kân.

Tơbleăng a rôh leh, pôa Tô Lâm tối nhên, tung mâu rôh tơplâ, Đồng Nai cho vâ mơhno tuăn chân krá khên tơnôu, môi tuăn ƀă Đảng, Tơnêi têa ƀă Kuăn pơlê. Ing kơpong tơnêi ai hên tơdroăng hmâ pêi pro dêi kăch măng Đồng Nai hiăng mơ-eăm chiâng môi tung mâu tíu xiâm dêi hngêi kơmăi, kơphô̆ ƀă tơrŭm cheăng ki kal dêi lâp tơnêi têa.

Tơdroăng chiâng pơlê kong kân râ xiâm po troăng mơnhông nếo, kal thế ai hnoăng ngăn rơkê khât troăng vâ pêi, ivá rak ngăn tung pêi cheăng tiô túa nếo ƀă hnoăng cheăng pêi kân tâ nếo a ngiâ kuăn pơlê, vâ pêi tiô pơkâ djâ Đồng Nai mot tung khu mâu kơphô̆ ki tơxâng rêh ối, tơxâng pơxiâm pêi cheăng dêi châu Á ƀă lâp plâi tơnêi.