Pôa Trần Thanh Mẫn, Kăn xiâm hnê ngăn Kuô̆k hô̆i tối rơdêi, kố cho roh pêi cheăng ki kal, xua Vi ƀan Luât ƀă Hnê arak luât cho kơ koan ai tíu cheăng, hnoăng cheăng ki má môi tung tơdroăng pêi cheăng dêi Kuô̆k hô̆i, ki má lối tung pơla Đảng pin mơnhên kêi đeăng pơkâ pêi, luât cho môi tung mâu tơdroăng ki châ tơƀrê ton xŏn, cho ‘’châ tơƀrê dêi tơdroăng châ tơƀrê’’; tơdroăng kêi đeăng pơkâ pêi po troăng ăm tơdroăng mơnhông mơdêk.

Kăn xiâm hnê ngăn Kuô̆k hô̆i pơkâ thế Khu hnê mơhno Vi ƀan tơkŭm tơpui tơno 5 tơdroăng ki kân, mê cho pêi pro inhên troăng pêi tơkŭm po ƀă pêi cheăng klêi kơ’nâi tơmot chiâng môi; tơdroăng pêi pro mâu hnoăng cheăng kân châ Đảng ủi Kuô̆k hô̆i, Vi ƀan pơkuâ Kuô̆k hô̆i, Kăn pơkuâ Kuô̆k hô̆i pơcháu, ki málối cho mơjiâng luât, hbrâ mơdât kâ kơhveăm liăn ngân, mơ’nhê tê kơtê, tơdroăng ki ôh tá lĕm tro; séa ngăn tâi tâng mơ-éa luât; séa ngăn xúa troăng pêi khu râ kăn pơkuâ 2 râ.