Tung mâu hâi achê kố, kuăn pơlê a Dak Lak kơdrâ tô tuăn xâ khât tơdroăng tơtôu tơpâm dêi rơpó tung hngêi trung pơla mâu hok tro… Mâu clip ‘nêk hô̆i đong, ‘nêk tơpui pro ‘mêi dêi pú ki hriâm châ tơbleăng tung măng pơlê pơla ôh ti xê to pro hên ngế chiâng hêng hôu mê ối mơhno tơbleăng hdrối ‘na tơdroăng ôh tá tơniăn tơpui ‘nêk dêi rơpó tung hngêi trung, ăm hlo ki tơrŭm pơla rơpŏng hngêi hok tro - ƀă hngêi trung hâi krá.   

Pôa Lưu Tiến Quang, Phŏ Pơkuâ xiâm ngăn Hnê hriâm ƀă Hnê mơjiâng tuăn ngôa rơkê kong pơlê Dak Lak ăm ‘nâi, kơvâ cheăng hiăng tơbleăng hên troăng hơlâ vâ mơdêk hbrâ mơdât, ing apoăng, ing hơngế. Mâu hlá mơ-éa chêh hnê mơho, mâu troăng hbrâ mơdât ‘nêk dêi rơpó tung hngêi trung châ tơbleăng hnê tối plâ hơnăm hriâm. Mơdât lơ ‘nêk dêi rơpó tung hngêi trung kal pơxiâm ing apoăng: mơjiâng môi hngêi trung hriâm tơniăn, rơkê rak tro luât ƀă hok tro thế tơmâng hngêi trung hnê, châ tơbleăng, kơjo kum ăm tuăn ngôa hok tro tơniăn teăm tơdrêng.