Kơxê hâi lơ 21/5, Vi ƀan hnê ngăn kuăn pơlê dêi kong pơlê Quảng Ngãi tơkŭm po hôp tối ‘na tơdroăng xo liăn ngân ’no mơjiâng tơmeăm khoăng a peăng mâ hâi Lu kong pơlê. Troh nôkố, lâp tung kong pơlê xo liăn ngân vâ pro dâng 927 rơtal liăn, châ lối 12% tiô pơkâ liăn dêi Ngế pro xiâm hnê ngăn Chin phuh pơcháu, iâ tâ kơlo riên dâ tâng tơdjuôm lâp tơnêi têa.

Krê kơpong peăng mâ hâi lu kong pơlê Quảng Ngãi châ pơcháu dâng 2.800 rơtal liăn vâ pro tơmeăm khoăng hơnăm 2026. Troh hâi lơ 20/5, kơpong mê hiăng xo lối 514 rơtal liăn, châ lối 18% pơkâ kơxô̆ liăn pơcháu. Kăn hnê ngăn Vi ƀan kong pơlê Quảng Ngãi tối, kơpong Tây Nguyên pơxiâm vâ mot tung rơnó mêi, tâng ôh tá rĕng pro tro tiô pơkâ kô tơdjâk kân troh tơdroăng mơjiâng pro mâu tơmeăm khoăng, tơdroăng tơkêa bro. Kăn hnê ngăn Vi ƀan kuăn pơlê kong pơlê pơkâ thế mâu ngế pơkuâ ‘no liăn pro, kong pơlê tơhrâ tơdroăng xo liăn ngân pro tiô tơrêm khế, pơtroh pơkâ nhên vâ tơkŭm tâi tâng, tơ’lêi séa ngăn.

Vi ƀan kuăn pơlê dêi kong pơlê pơkâ thế mâu cheăm tơkŭm pêi klêi mâu tơdroăng ki u ối tơvâ tơvân ‘na tơnêi vâ mơjiâng pro, liăn chêl thiăn ki ối mơdon tung hên hơnăm. Mâu ngế ki ối tơvâ tơvân thế tơrŭm ƀă nhên khât, ối ‘nân tơpui tơno tah ki xơpá, pôi tá ăm ai tơdroăng mơnĕn ngế ki kố pơcháu hnoăng cheăng ăm ngế ki ê ah chiâng tơdjâk tơdroăng cheăng tơdjuôm.