Tâng a ngiâ hngêi ki dó inâi râ má 4 ki lĕm, tâng vâi hdrêng xah hêi tơpui tó a plông, jâ H’Pé Niê ối a Buôn Trí, cheăm Buôn Đôn, kong pơlê Dak Lak ôh tá kơtôa rơrêk tung hiâm mơno drêng pơchông tơdroăng rêh ối phâi tơtô hâi kố ƀă mâu khế hơnăm pơlê ối kơklêa nah, troăng prôk ‘mêi ‘mâk, tơdroăng rêh ối xơpá pêi lăm tăng kế kâ. Ƀă jâ, tơdroăng ki pơ’lêh hâi kố ôh ti xê to hngêi ối krá lĕm troăng prôk lĕm rơdâ, mê ối cho tơdroăng vâ mơhno ăm pin hlo tâ ki hơniâp, loi khât drêng kuăn pơlê châ Đảng, Tơnêi têa, mâu kăn cheăm kong pơlê tơmâng tŏng gum, ai tơdroăng cheăng kâ tơniăn.

Ing mê, mâu kuăn pơlê rêh ối a tíu tơkăng kong môi tiah jâ H’Pé Niê hmiân tuăn rêh ối krá ƀă pơlê, rak ki môi tuăn dêi kuăn pơlê a tíu tơkăng kong.

“Nôkố kuăn pơlê châ rêh ối hmiân tuăn hlối hơniâp lĕm. Hngêi pơkeăng, hngêi trung, troăng prôk ƀă hên ki ê ki lâi xuân ai, tối tơdjuôm cho hiăng ai hmê kâ phâi tơtô, hơniâp ro ’nâng”.

Ki phiu ro dêi jâ H’Pé Niê xuân cho hiăng tâ tung hiâm mơno hlo dêi hên rơpŏng kuăn pơlê mâu kuăn ngo a Dak Lak kơ’nâi mâu hơnăm châ pơtối pêi mâu tơdroăng pơkâ tŏng gum mơnhông cheăng kâ, xăm kơtiê krá ton. Ing tuăn tơmiât “kơjo gum môi pâ”, cheăm hiăng pơ’lêh rơdêi hriăn plĕng cheăng kâ krá ton hơnăm, mơhnhôk kuăn pơlê mơ-eăm pêi cheăng kâ. Ing kơxô̆ liăn tŏng gum  rơtế ƀă khu cheăng kal kí a cheăm, hên rơpŏng kuăn pơlê hiăng khên xúa khoa hok kih thuât tung pêi chiâk, mơnhông cheăng kâ tung rơpŏng hngêi, chôa lâng mơnhông vâ hluăn kơtiê.

Troh khế 5 hơnăm 2026, lâp tung kong pơlê Dak Lak ai lối 833.500 rơpŏng kuăn pơlê. Tung mê, ai lối 34.000 rơpŏng, châ 4,13%, krê kơxô̆ rơpŏng kơtiê kơpong kuăn pơlê mâu kuăn ngo ối dâng 10%. Tung hneăng ki kố, Dak Lak pơkâ xăm kơtiê pơtối cho môi tung mâu tơdroăng pêi pro ki kal má môi, ƀă pơkâ xăm kơxô̆ rơpŏng kơtiê tung kuăn pơlê mâu kuăn ngo sap ing 3% tơngi klêng rêm hơnăm. Vâ ai tiah tơdroăng pơkâ mê, hnoăng cheăng dêi khu xiâm kal kí a pơlê cheăm châ ngăn cho ki xiâm.

Jâ H’Đa Nê Byă, Kăn hnê ngăn Chi ƀô̆ Buôn Đôn, cheăm Buôn Đôn, kong pơlê Dak Lak ăm ‘nâi, tơdroăng xăm kơtiê tung pơlê dế pêi ahdrối châ tơmâng má môi, pơcháu cheăng pêi nhên ăm tơrêm đảng viên, tơrêm kăn ƀô̆ pơlê vâ veăng kum mâu rơpŏng kơtiê.

“Ngi tơmâng khât tơdroăng cheăng hnê tối, mơhnhôk kuăn pơlê veăng tơ’noăng pâ nhoăm tơnêi têa, môi tiah tơdroăng mơhnhôk mơjiâng thôn pơlê nếo. Mâu khu rak ngăn, khu grup a thôn, pơlê xuân hbrâ kơjo kum ‘na cheăng kâ, kum kuăn pơlê mơnhông cheăng kâ tung rơpŏng hngêi vâ hluăn kơtiê krá ton”.

Tơdrêng ƀă mơnhông cheăng kâ, Dak Lak tơmâng khât troh ‘no liăn hnê hriâm, vâ kuăn pơlê hlê hlối thăm mơnhông tuăn loi tung kuăn pơlê a kơpong hơngế hơngo, kơpong tíu tơkăng kong.

A mâu cheăm tơkăng kong ƀă achê kơpong tíu tơkăng kong peăng mâ hâi Lu dêi kong pơlê Dak Lak, hên tơmeăm khoăng hngêi trung hriâm ki kân dế thâ pro. Pơla hơnăm 2025-2030, Dak Lak châ Đảng, Tơnêi têa, ‘no lối 485 rơtal liăn vâ pro 5 to hngêi trung phôh thong hnê kuăn ngo ai tíu kâ koi ối pơtê pơtối râ.

Pôa Lê Thanh Sơn, Phŏ kăn hnê ngăn Vi ƀan cheăm Buôn Đôn ăm ‘nâi, hngêi trung pơtối râ a cheăm ai tâi tâng liăn pro lối 158 rơtal liăn, ai tiô tơdroăng púi vâ hriâm ăm lối 1.150 ngế hok tro. Kố ôh ti xê cho hngêi trung hnê mê ối cho luât pơkâ tơniăn ai pơxúa ton ta ah.

“Hngêi trung kố kô pro hlâu ai tơmeăm xúa tung hriâm tâp tro tâ ăm kuăn ‘nĕng kuăn ngo, hlối kum kuăn pơlê hmiân tuăn pêi cheăng kâ pơlê, rế mơnhông cheăng kâ ƀă rơtế rak tíu tơkăng kong”.

Drêng tơdroăng rêh ối rế tơniăn, tuăn loi dêi kuăn pơlê ƀă Đảng ƀă Tơnêi têa xuân châ ‘mâi mơnhông. A hên pơlê, mâu krâ pơlê, cho mơngế ki kuăn pơlê pâ nhoăm hiăng chiâng ngế ki xiâm tung hnê tối mâu tơdroăng, mơhnhôk kuăn pơlê ‘nâi hbrâ rơnáu xêh tơdroăng dêi khu ‘mêi tơpui pơlông, pro tơklâ ki tơrŭm môi tuăn dêi kuăn pơlê hdroâng mơngế. Pôa Bàn Tôn Nhất, ngế ki châ kuăn pơlê pâ nhoăm ối a cheăm Ea M’Droh, kong pơlê Dak Lak ăm ‘nâi, tơdroăng tơplâ ‘na tuăn ngôa vâ kring tơniăn pơlê pơla châ rak vế pêi pro đi đo:

“A đi đo hnê tối kuăn pơlê thế hbrâ rơnáu, pôi tơmâng khu ‘mêi djâ pro tơ‘nhiê Tơnêi têa. Kơnôm pêi pro tro tơdroăng hnê mơhnhôk mê kuăn pơlê akố đi đo rak tro tiô troăng hơlâ dêi Đảng, luât tơnêi têa”.

Klêi kơ‘nâi 40 hơnăm pêi tơdroăng pơ’lêh nếo, tơdroăng rêh ối cheăng kâ pơlê pơla a hên pơlê tung kơpong hơngế hơngo dêi kong pơlê Dak Lak hiăng pơ’leh nhên. Mâu troăng nếo pro kêi, mâu túa cheăng kâ châ tơbrê, mâu hngêi trung dế pro hiăng vâ kêi a tíu tơkăng kong ôh tá xê to pro pơ’lêh ngiâ méa kơpong kuăn ngo mê ối veăng ‘no hnoăng mơnhông tuăn loi dêi kuăn pơlê ƀă Đảng, Tơnêi.

Tiô pôa Nguyễn Hoàng Giang, Ngế pơkuâ Kăn ‘na Kuăn ngo ƀă Loi tĭng Tiô khôp kong pơlê Dak Lak, tung pơla hơnăm 2021-2025, hiăng lối 8.000 rơtal xo liăn dêi tơdroăng pơkâ dêi tơnêi têa châ xoăng ăm mâu cheăm tung kong pơlê (mê cho tá kong pơlê Phú Yên ton nah). Tung pơla hơnăm 2026 - 2030, kong pơlê kô pơtối tơbleăng pêi tơƀrê Tơdroăng pơkâ dêi tơnêi têa, rơtế mơnhông cheăng kâ hlối rak túa lĕm tro ƀă rêh ối.

“Ƀă Dak Lak ƀă kơpong Tây Nguyên, tơdroăng hnê kuăn pơlê ƀă ‘na loi tĭng tiô khôp cho xiâm vâ rak tơniăn kal kí, pơlê pơla ƀă xuân cho xiâm vâ mơnhông krá ton. Drêng mâu luât pơkâ châ tơbleăng tơtro pơla mơnhông cheăng kâ, pơtối rak túa lĕm tro ƀă tơniăn rêh ối pơlê pơla kô pro xiâm ki kra kâk vâ cheăm pơtối rak vế tơmeăm khoăng, rak ki tơniăn ƀă mơnhông tuăn loi dêi kuăn pơlê a troăng hơlâ dêi Đảng, Tơnêi têa”.

A kong pơlê Dak Lak ăm hlo, tơmâng troh tơdroăng rêh ối dêi kuăn pơlê kuăn ngo, vâ cheăng kâ krá ton ăm kuăn pơlê ing troăng hơlâ luât pơkâ rak tơniăn kal kí ing cheăm bêng. Kố cho xiâm ki kal vâ ‘mâi mơnhông khu tơrŭm môi tuăn tâi tâng hdroâng mơngế, mơjiâng krá hiâm mơno kuăn pơlê a kơpong kong ngo Tây Nguyên.