Kong pơlê Dak Lak (klêi kơ’nâi tơ’mot chiâng môi ƀă kong pơlê Phú Yên) ai ƀăng tơnêi lối 18.000km2, pơ’leăng mâ mơngế lối 3,34 rơtuh ngế, ai tơnêi ki lôi chúa mơnhông mơdêk nếo ƀă hnoăng tơdjêp Tây Nguyên ƀă Kơpong tơbăng Pá hdroh peăng Tơdế tơnêi têa. Tơdroăng ki ‘mâi bro i lĕm tro Pơkâ pêi Dak Lak hneăng hơnăm 2021 – 2030, tơmiât pêi troh hơnăm 2050 châ pơkâ vêh mơnhên tơnêi tơníu cheăng kâ, tơnêi tơníu cheăng kal kí dêi kong pơlê; tơdrêng amê xúa châ tơƀrê mâu roh tơ’lêi tơdjêp kơpong, mot tơrŭm lâp plâi tơnêi.

Mâu pơkâ, troăng mơnhông châ séa ngăn tiô troăng tơdâng tơ’mô, tơtro pơla mâu kơvâ, cheăng kâ ƀă kong pơlê, tơtro ƀă mơgế ki ai khât, tơmiât la ngiâ tơtêk 11 – 11,5% hneăng hơnăm 2026 – 2030. Tiô phŏ Yăo sư, Tiê̆n sih Lê Xuân Bá, kăn pơkuâ hriăn plĕng pơkuâ cheăng kâ Tơnêi têa, mơnhông mơdêk kơmăi kơmok kal châ ngăn cho kơjo má môi tung tơdroăng ‘mâi rơnêu bro i lĕm pơkâ dêi kong pơlê.

“Pơkâ mơnhông kơmăi kơmok dêi kong pơlê Dak Lak tá hâi châ tơmâng pêi pro tro kơlo. Mơni tung pơla kố nah ƀă tung 2 – 3 hơnăm la ngiâ Dak Lak pá mơnhông kơmăi kơmok môi tiah pói vâ, kố cho tơdroăng ki ai khât, laga cho pơkâ hneăng hơnăm 2021 – 2030 ƀă tơmiât pêi troh hơnăm 2050, mê Dak Lak thế pơkâ ki xiâm mơnhông cheăng kơmăi kơmok. Xua vâ kro mơdrŏng mê thế pơkâ pêi mơnhông cheăng kơmăi kơmok a kơlo ki tơtro’’.

Veăng tơpui ăm pơkâ pêi dêi Dak Lak, hên ngế ki rơkê, khu pơkuâ ƀă mâu khu tê mơdró xuân tối, pơkâ pêi kal pêi inhên tâ tơdjêp tíu, hngêi trăng troăng klông ƀă ivá tơtêk pơla Tây Nguyên ƀă Kơpong tơbăng Pá hdroh peăng tơdế tơnêi têa.

Tơdrêng amê, mơdêk ki tơdjêp kơpong ing hngêi trăng troăng klông ton xŏn, logistics, kơno têa kơxĭ, tíu tê mơdró ngi kong têa ê ƀă ôm hyô ƀă rak vế khôi túa lĕm tro kong pơlê. Yăo sư, Tiê̆n sih Nguyễn Thị Phương Trâm, Kăn pơkuâ Kơ koan xiâm Khôi túa lĕm tro Việt Nam, pơkâ Dak Lak mơjiâng troăng pêi cheăng ton xŏn mơnhông ôm hyô tiô xiâm kối rak vế ƀă mơnhông ki kơnâ khôi túa lĕm tro kong pơlê.

“Tung pơkâ pêi ƀă ‘mâi rơnêu bro i lĕm pơkâ pêi, pin kal tơtrŏng tâ nếo tíu mơhno khôi túa lĕm tro mâu hdroâng kuăn ngo. Kố cho ki xiâm kal khât, pro chiâng ki phá tơ-ê ki kơnâ khôi túa lĕm tro dêi Dak Lak tối krê ƀă Tây Nguyên tối tơdjuôm. Rêm ki kơnâ, rêm ki phá tơ-ê khôi túa lĕm tro hdroâng kuăn ngo pơrá kal môi tíu khôi túa lĕm tro krê vâ pơlê pơla rêh ối, păn tơdroăng khôi túa lĕm tro mê vâ mơnhông ƀă rak vế’’.

Tơmâng xo rơkong tơpui tá ihiâm mơno, ai ki kơnâ ing mâu ngế ki rơkê, ngế pơkuâ, khu tê mơdró a hôp tơno, kăn pơkuâ kong pơlê Dak Lak tối ăm ‘nâi kô pơtối séa ngăn, mơnhên tâi tâng mâu tơmeăm ki ai hlâu, ki tơ’lêi xuân môi tiah tơdroăng ki u ối ai, kơdroh vâ kêi đeăng  troăng prôk la ngiâ mơnhông mơdêk tơtro ƀă hneăng nếo klêi kơ’nâi tơmot chiâng môi.

Dak Lak mơnhên tơdroăng pơhlêh pơkâ thế châ pêi pro inhên, tơdâng tơ’mô, tơniăn mơnhông tâi tâng tơnêi ki lôi chúa vâ mơdêk tơtêk, thăm tơdjêp kơpong xúa châ tơƀrê mâu tơmeăm mơnhông mơdêk. Tiô pôa Đỗ Hữu Huy, Kăn hnê ngăn Vi ƀan kong pơlê Dak Lak, tơdroăng ‘mâi rơnêi bro i lĕm pơkâ kô rĕng châ tơbleăng Hô̆i đong kong pơlê séa ngăn, kĭ tung la ngiâ.

“Vi ƀan kong pơlê pơkâ mâu khu, kơvâ cheăng, kong pơlê, kơ koan ki tơdjâk ƀă tơrŭm tíu pêi cheăng tơkŭm mơngế pêi cheăng, tơmâng xo tŭm mâu rơkong veăng tơpui dêi mâu kăn teăng mâ vâ tơniăn hô sơ pơkâ châ pơkâ pêi. Tơdrêng amê, kong pơlê xuân pói vâ pơtối tơdah châ mâu rơkong veăng tơpui dêi mâu ngế rơkê, ngế cheăng khoa hok ƀă kăn pơkuâ khoa hok ƀă kăn pơkuâ kong pơlê ing mâu rơxông tung la ngiâ’’.