Teăng mâ Kăn xiâm pơkuâ hnê ngăn Đảng, Tơnêi têa, Mặt trâ̆n tơnêi têa Việt Nam, pôa Trịnh Văn Quyết, Ngế pơkuâ tơdroăng kal kí ƀă Hnê mơhnhôk Tíu xiâm rơkâu ăm Khu xiâm ngăn Khôp Phop ƀă mâu ƀok phop jâ phop kuăn pơlê ki tiô khôp Phop tung lâp tơnêi têa rêh ối tơniăn lĕm, hơniâp ro. Ngế pơkuâ tơdroăng Kal kí ƀă Hnê mơhnhôk Tíu xiâm loi khât, ƀă tơdroăng reh ối lĕm, tuăn rơkê, hơniâp ƀă ‘nâi pâ tơnêi têa, Khu ngăn khôp Phop Viêt Nam kô pơtối rơtế ƀă dêi rơpó mâu hdroâng mơngế; mơhnhôk mâu kuăn khôp, thế kơhnâ veăng pêi tơdroăng cheăng tơ’noăng pâ nhoăm tơnêi têa, veăng ‘no hnoăng tơxâng a tơdroăng cheăng mơnhông tơnêi têa.

Rôh kố, Ngế pơkuâ tơdroăng kal kí ƀă Hnê mơhnhôk Tíu xiâm rơkâu Khu xiâm ngăn Khôp Phop Việt Nam tơkŭm po klêi tơniăn hneăng hôp mâu kăn tung lâp tơnêi têa rôh má 10. Hlối tơmâng xo mâu hnoăng veăng ‘no ki kân dêi mâu kuăn pơlê ki tiô khôp Phop ƀă tơdroăng cheăng rơtế mơnhông tơnêi têa, ‘mâi mơnhông ki tơrŭm dêi rơpó tâi tâng kuăn pơlê hdroâng mơngế.