Pôa Miguel Diaz-Canel - Kăn xiâm pơkuâ hnê ngăn Đảng má môi, Kăn xiâm hnê ngăn kong têa Cuba hâk mơnê rơkâu Đảng pin  hiăng tơkŭm po klêi tơmiăn hneăng hôp Đảng rôh má 14, rơkâu Khu kăn  cheăng tung tíu Xiâm, Khu xiâm Kal kí ƀă pôa Tô Lâm - Kăn xiâm pơkuâ hnê ngăn Đảng hiăng châ hneăng Hôp loi nhoăm rah xo  pêi hnoăng cheăng pro kăn xiâm pơkuâ hnê ngăn tung hneăng ki nếo.

Pôa Tô Lâm - Kăn xiâm pơkuâ hnê ngăn Đảng tối, hneăng hôp rôh má 14 hiăng klêi hôp tơniăn lĕm, pê klêi hnoăng cheăng pơcháu ki kân. Hneăng hôp hiăng tối mơgêi tâi tâng tơdroăng pêi pro tiô Pơkâ hneăng hôp má 13, klêi mê, tung plâ 40 hơnăm pơ’lêh nếo ƀă ki tơƀrê pêi tro tiô Luât, troăng hơlâ mơnhông cheăng kâ - rêh ối, pơkâ mâu troăng hơlâ, tơdroăng cheăng pêi tung 5 hơnăm la ngiâ, pơkâ mâu tơdroăng ki kân ƀă tung la ngiâ ƀă tơdroăng dêi hdroâng mơngế  Việt Nam tung rơxông nếo mơnhông tơƀrê.

Kăn xiâm pơkuâ hnê ngăn Đảng tối, Việt Nam nhoăm khât tơrŭm cheăng ki kal lĕm ƀă Cuba, vâ pêi tâi tâng mâu tơdroăng ki tơná chiâng vâ ôh tá pơtê ki mơnhông tơrŭm môi tuăn tiah hmâ ing nah, po rơdâ, mơdêk ki tơƀrê tung tơrŭm cheăng pơla péa pâ, xua vâ pro pơxúa dêi kuăn pơlê péa tơnêi têa, xua hơniâp lĕm, tơrŭm ƀă mơnhông a tơrêm kơpong ƀă tung lâp plâi tơnêi.