Pôa Tô Lâm, Kăn xiâm pơkuâ hnê ngăn Đảng kheăn kơdeăn, mơnhên tơdroăng veăng gum dêi kuăn pơlê mâu hdroâng kuăn ngo tơring Quản Bạ tung tơdroăng châ tơƀrê tơdjuôm dêi kong pơlê, dêi tơnêi têa. Kăn xiâm pơkuâ hnê ngăn Đảng mơnhên troăng prôk la ngiâ khu râ kăn pơkuâ hnê ngăn Đảng, khu râ kăn pơkuâ, kuăn pơlê mâu hdroâng kuăn ngo Quản Bạ, pơtối mơnhông khôi túa vâi krâ nah tơrŭm môi tuăn ƀă mâu tơdroăng châ tơƀrê hiăng châ kal tah lôi mâu tơdroăng ki pá puât, tơvâ tơvân, rơtế dêi pó tơdjuôm ivá, môi hiâm mơno mơ’no ivá tơ’noăng khŏm ƀlêi trâng mâu hnoăng cheăng gum mơnhông cheăng kâ – rêh ối pơlê pơla, rak tơniăn gâk kring tơnêi têa – gâk kring pơlê pơla, tơxâng ƀă tíu cheăng cho tíu a ko, tíu ki tât tơkăng kong peăng kơnhŏng  dêi Tơnêi têa.

Quản Bạ cho tơring cho tíu mot lo dêi 4 tơring kong ngo, tơkăng kong peăng Kơnhŏng dêi kong pơlê Hà Giang, ối tung Kơdrum reăng kiâp hmốu lâp plâi tơnêi UNESCO kơpong tơbăng kân rơdâ hmốu Đồng Văn.

Rơtế a hâi mê, pôa Tô Lâm, Kăn xiâm pơkuâ hnê ngăn Đảng troh trâm mâ, tơpui tơno ƀă ôu têa chế ƀă kơdrâm vâi krâ kuăn pơlê mâu hdroâng kuăn ngo tung tơring ƀă diâp 30 kơxuô tơmeăm ăm mâu rơpŏng châ tơnêi têa tŏng gum, rơpŏng mơngế ai hnoăng kăch măng ai hên tơdroăng kơdo mơ-eăm tung tơdroăng rêh ối, cheăng kâ ƀă châ ngăn leh tơbeăng Kơnhon xuăng on dêi kuăn pơlê mâu hdroâng kuăn ngo Pà Thẻn, kong pơlê Hà Giang./.