Tung rôh lăm pôu, pôa Tô Lâm, kăn xiâm pơkuâ hnê ngăn cheăng Đảng hiăng ai rôh tơpui tơno ƀă pôa Thongloun Sisoulith, Kăn xiâm pơkuâ hnê ngăn cheăng Đảng, Kăn hnê ngăn kong têa Lếo; tơpui tơno ƀă pôa Sonexay Siphandone, Ngế pro xiâm hnê ngăn kong têa, pôa Saysomphone Phomvihane, kăn xiâm hnê ngăn Kuô̆k hô̆i; pôu mâu kăn xiâm pơkuâ Lếo hneăng hdrối; veăng ai mâ a Leh tơbâ 50 hơnăm hâi mơjiâng kong têa; ‘măn rơvĭng reăng a Tíu meăm um tơbâ mâu lêng ki hiăng hlâ; tơpui a Học viê̆n Chính trị ƀă Hành chính Quốc gia Lếo; veăng a leh hiăng pro klêi Kŏng viên Tơrŭm tơroâ Lếo – Việt Nam ƀă mâu tơdroăng cheăng ki ê; rơtế veăng pơkuâ po Rôh trâm mâ tơrá khu kăn pơla Đảng Kŏng san Việt Nam ƀă Đảng Nhân yân kăch măng Lếo.

Rôh lăm pôu kố, péa pâ hiăng kĭ mâu hlá mơ-éa tơrŭm cheăng ki kal, pro chiâng troăng hơlâ luât, po troăng mâu pơkâ tơrŭm cheăng nếo, tơtro ƀă pơkâ thế mơnhông dêi rêm tơnêi têa ƀă ki pơxúa tơdjuôm dêi péa hdroâng kuăn ngo, pơtối pro trâu hngế tâ tơrŭm cheăng pơla Việt Nam – Lếo tung tơdroăng nếo.