Ing mê, tơbleăng dêi khu xiâm séa ngăn Chin phuh ƀă tơdroăng veăng hnê tối, tơbleăng dêi mâu kăn ki veăng hôp, tối tơbleăng mơgêi, pôa Tô Lâm, Kăn xiâm pơkuâ hnê ngăn Đảng tơmâng xo mâu tơdroăng ki mơ-eăm dêi khu kăn séa ngăn Chin phuh ƀă tâi tâng kơvâ cheăng séa ngăn tung pêi pro tơdroăng cheăng tơdah kuăn pơlê, tơleăng mơnhên hlá đơn săm phoăng, săm tơkêng tung pơla hdrối nah.

Ki tơƀrê, cho ing apoăng hneăng troh nôkố kơvâ séa ngăn hiăng tơleăng hên tơdroăng ki kân hiăng tơdah vâ chê 9 rơpâu ngế kuăn pơlê ƀă lối 8.000 tơdroăng cheăng ƀă vâ chê 1.000 ngế ki tơkŭm krâm mơngế; tơdah xo, tơleăng vâ chê 48 rơpâu hlá đơn dêi kuăn pơê, tăng ngăn, tơrŭm tơleăng mơnhên lối 1.000 tơdroăng săm phoăng, săm tơkêng krâm mơngế ki u ối, tơvâ ton hơnăm; ing mê, pơtối rak tơniăn hnoăng pơxúa ăm hên ngế, khu tơrŭm cheăng ki tơdjâk troh.

Tối nhên, tung la ngiâ Đảng, tơnêi têa kô tơbleăng tơdrêng hên troăng hơlâ, luât pơkâ ki kân, pêi tơƀrê, pro xiâm krá kak vâ mơnhông tơnêi têa, malối cho hbrâ tro tơniăn hneăng hôp Đảng rêm râ, troh Hneăng hôp Đảng tung lâp tơnêi têa; xua mê, tơdroăng tơleăng mơnhên săm phoăng, săm tơkêng thế châ tơmâng ngăn khât tâ.