Xông tơpui a roh pêi cheăng, pôa Tô Lâm, Kăn xiâm pơkuâ hnê ngăn Đảng mơnhên, vâ cheăng kâ rêh ối pơlê pơla mơnhông tơniăn ƀă krá tơniăn kal tơdroăng ki veăng dêi khu cheăng kal kí, tơdroăng ki veăng dêi mâu khu cheăng kâ ƀă kuăn pơlê, vâ châ tơdroăng kố ki kal má môi cho kêi đeăng luât ‘na troăng hơlâ mơhnhôk mơ’no liăn cheăng ƀă mơnhông cheăng kâ.

Tiô Kăn xiâm pơkuâ hnê ngăn Đảng tơdroăng ki kal thế pêi tơdrêng cho pro pơhlêh tíu mơ’no liăn cheăng tê mơdró, mơ-eăm kơdroh ki vâ iâ 30% kơxô̆ liăn tê mơdró, tơdroăng pro mơ-éa ƀă tah lôi ki vâ iâ 30% tơdroăng tê mơdró ôh tá kal; mơ-eăm tung 2 – 3 hơnăm la ngiâ tíu mơ’no liăn cheăng tê mơdró dêi tơnêi têa pin ối má 3 tung Kơpong ASEAN.

Pakĭng mê, kal khên tơnôu, kơtăng xúa pơhlêh kŏng ngê̆ tung pêi cheăng, pơhlêh nếo tơmiât pêi rơkê, troăng pơkâ pêi ki phá tơ-ê ‘na liăn ngân; pơtối pơkâ ‘na luât krê ăm mâu Kơpong cheăng kâ krê a mâu pơlê kong kân; troăng kơjo ki phá tơ-ê, ai troăng pơka pêi ki phá tơ-ê tung tơdroăng tơleăng mâu tơxup tơbriât tê mơdró; ai troăng hơlâ ‘na tơnêi tơníu, tơnêi tê mơdró mơdêk pêi pro tíu kơdrâm kuăn pơlê rêh ối tê mơdró cho ki xiâm tơtêk dêi tơnêi têa.