Kơxo lơ 4/2, a Tíu pêi cheăng xiâm Đảng, pôa Tô Lâm, Kăn xiâm pơkuâ hnê ngăn Đảng pơkuâ roh hôp Khu pơkuâ hnê ngăn cheăng Đảng, mơnhên tơdroăng po rơdâ pêi pro Pơkâ kơxô̆ 40 dêi Khu pơkuâ hnê ngăn cheăng Đảng ‘na tơdroăng tơkŭm po Têt Ất Tỵ hơnăm 2025; hnê mơhno mâu hnoăng cheăng ki xiâm dêi Tơnêi têa, mâu râ tung la ngiâ. Mơgêi Hneăng hôp, pôa Tô Lâm, Kăn xiâm hnê ngăn Đảng kheăn kơdeăn, mơnhên păng ‘nâng mâu râ, mâu kơvâ cheăng, mâu kơ koan, tíu cheăng, kong pơlê hiăng hlê plĕng, po rơdâ pêi pro kơtăng, ai xêt khât Pơkâ kơxô̆ 40 ‘na tơkŭm po Têt Lo hơnăm nếo Ất Tỵ 2025.

‘Na mâu hnoăng cheăng xiâm tung la ngiâ, ki xiâm môi tuăn ƀă 09 khu hnoăng cheăng hiăng pơkâ mơ’no, Kăn xiâm pơkuâ hnê ngăn Đảng tối nhên pơkâ mâu kơ koan, tíu cheăng, kong pơlê rup kŏng tung tơdroăng klêi kơ’nâi pơtê Têt, ôh tá lôi ăm ai tơdroăng kâ Têt ton, tơngôu tơdroăng cheăng, tơkŭm pêi kêi đeăng tơdroăng pơkâ mơ’no mâu tơdroăng cheăng dêi khế 2/2025 ƀă Pái khế apoăng hơnăm 2025; tơkŭm po leh mơdĭng apoăng hơnăm tơniăn lĕm, kơdĭng, tơleăng kơtăng mâu tơdroăng ki pro pơxúa ăm dêi tơná, pro tơ-ê.

Hbrâ inhên mâu tơdroăng xiâm hneăng hôp Kuô̆k hô̆i khế 2/2025, ki má lối cho mâu tơdroăng xiâm tơdjâk troh rah xo tơtro khu pêi cheăng tơnêi têa ƀă tah lôi mâu tơdroăng pá puât, tơvâ tơvân ‘na pơkâ pêi. Khŏm mơ-eăm pêi pro kơtăng mâu troăng hơlâ, troăng pêi pro pơkâ tơtêk GDP lối 8% hơnăm 2025, mơjiâng tơdroăng ki tơtêk 2 kơxô̆ tung hneăng hơnăm 2026 – 2030.