Mơgêi roh pêi cheăng pôa Tô Lâm, Kăn xiâm pơkuâ hnê ngăn Đảng pơkâ, lâp kơvâ khăm pơlât mơdêk hiâm mơno lĕm tung kăn ƀô̆ khăm pơlât, pakĭng pêi pro tro mâu rơkong hnê dêi Pôa Hồ ƀă kăn ƀô̆ kơvâ khăm pơlât mê rêm thái pơkeăng, ƀok thái pơkeăng, kăn ƀô̆, kŏng nhân viên kơvâ khăm pơlât pakĭng pêi tơtro tơdroăng cheăng mê, kal mơdêk hlê plĕng nhuô̆m ƀă gâk kring châ chăn, ivá mâu ngế châi tamo; khăm pơlât tơdâng, ôh tá pơrah ‘’mâu ngế nhŏng o ki troh ngăn’’ ngế châi tamo; nhuô̆m hnoăng ƀă hiâm mơno dêi ngế châi tamo; tơdrăng lĕm, ôh tá tơdjâk pa kong tung pêi cheăng; đi đo hriâm tâp mơdêk tơdroăng ki rơkê, tơdroăng cheăng; mơhno hnoăng cheăng ƀă pơlê pơla, vâ cho khât ‘’Nôu ki têm rơpiât’’ tung mâu ngế châi tamo ƀă rơpŏng ai ngế châi tamo.

Pakĭng mê, pơtối rak krá tơniăn ƀă mơdêk ki dâi lĕm khăm pơlât, ai kơmăi khăm pơlât ki dâi ƀă hngêi trăng ăm tíu xiâm khăm pơlât tơring, hngêi pơkeăng cheăm; tơniăn hngêi pơkeăng cheăm ai tŭm ƀok thái pơkeăng ƀă mâu ngế thái pơkeăng, ƀok thái pơkeăng rơkê, ki rơhêng vâ tối cho a kơpong hơngế, hơngo; đi đo pơhlêh lĕm tơdroăng khăm pơlât vâ mơhnhôk kuăn pơlê khăm pơlât a cheăm teăng ki lăm pơlât a hngêi pơkeăng râ kơpêng.