Mâu hơnăm hdrối mê hía nah, cheăng tơrŭm pơla Việt Nam ƀă Phần Lan mơnhông châ tơƀrê, Phần Lan đi đo ngăn Việt Nam cho khu tơrŭm ki kơjo má môi tung kơpong Đông Nam Á. Roh lăm pôu pêi cheăng păng ‘nâng roh kố hco hdró tơdroăng ki kal, mơnhên tơdroăng loi tơngah kal kí  ƀă po troăng tơrŭm cheăng nếo pơla péa tơnêi têa.

Việt Nam ƀă Phần Lan pơtối thăm pêi pro, raki krá tơniăn tung mâu kơvâ tiô khôi vâi krâ nah môi tiah hnê hriâm  - hnê mơjiâng tuăn ngôa rơkê, kơvâ cheăng ‘na khoa hok – kŏng ngê̆, rak vế hyôh kong prâi, pêi chiâk deăng; tơdrêng amê, po rơdâ troh mâu kơvâ nếo mê cho pơhlêh xúa kŏng ngê̆, on tơhrik ki vêh pro ing hyôh tô mâ hâi, hyôh khía, ‘mâi pơhlêh vâ cheăng kâ pơtối tâk. Kố cho mâu troăng prôk ki tơtro ƀă troăng tơmiât mơnhông mơdêk krá tơniăn, djâ ki pơxúa ăm kuăn pơlê péa tơnêi têa ƀă veăng kum hên tung hnoăng ki pro hơniâp lĕm, tơrŭm cheăng, mơnhông mơdêk a kơpong xuân môi tiah lâp plâi tơnêi.