Tơpui tơno ƀă kơdrâm mâu nhŏng o kŏng nhân pêi cheăng pro kơchâ. Pôa Tô Lâm, Kăn xiâm pơkuâ hnê ngăn Đảng tối, ôh tá xê to tung tơplâ vâ pro ăm tơnêi têa tơniăn krê hdroâng mơngế mê tung pơla pêi cheăng kring vế ƀă mơjiâng luât xah hô̆i chuh ngiah, giai cấp kŏng nhân Việt Nam, tung mê ai kŏng nhân pro kơchâ, đi đo cho mâu ngế pêi cheăng xiâm, djâ troăng ahdrối tung pêi cheăng, tung ‘mâi mơnhông cheăng kâ, tung pêi mâu tơdroăng cheăng ki kal dêi tơnêi têa.

Pôa Tô Lâm pơkâ thế ƀă púi vâ kŏng nhân ƀă kơvâ cheăng pro kơchâ - tơmeăm khoăng tung kơdâm tơnêi kal châ pơ’lêh mâu  tơdroăng cheăng ki kal, mê cho: Mơdêk pêi lo hên, tơmeăm pêi lo tơƀrê lĕm ƀă ki pơxúa hnoăng mơngế pêi cheăng hiăng pêi lo. Tâi tâng kơvâ cheăng kô pơtối hơ’lêh nếo tơkŭm pêi cheăng, mơdêk hơ’lêh nếo, xua khoa hok - kơmăi kơmok ƀă pơ’lêh kơxô̆ tung tơdroăng pơkuâ, rak ngăn kơchâ.

Kăn xiâm pơkuâ hnê ngăn Đảng  pâ thế Grup dêi hngêi kơmăi pêi cheăng pro kơchâ ƀă Tơmeăm khoăng tung kơdâm tơnêi Việt Nam pơtối tơmâng pro hngêi ối, tơmeăm pơxúa ƀă mâu tơdroăng vế hdró pêi cheăng ‘na pơlê pơla ăm mâu kŏng nhân.  Malối kal mơjiâng tíu ối tơniăn, rơkê plĕng, hmâ kô kum mâu kŏng nhân hmiân tuăn pêi cheăng ton hơnăm, hmâ ƀă tơdroăng pro kơchâ - ƀă kơvâ cheăng.