Tung roh lăm pôu pêi cheăng păng ‘nâng kong têa Phần Lan sap hâi lơ 20 – 22/10, a Helsinki, Pôa Tô Lâm, Kăn xiâm pơkuâ hnê ngăn Đảng Kŏng sản Việt Nam hiăng ai roh trâm mâ jâ Tiina Snadberg, Kăn xiâm hnê ngăn Đảng Kŏng san Phần Lan.

A roh tơdah, pôa Tô Lâm, Kăn xiâm pơkuâ hnê ngăn Đảng tối ăm ‘nâi; tung roh lăm pôu pêi cheăng kố, péa pâ hiăng môi tuăn mơdêk tơrŭm cheăng to Khu tơrŭm cheăng ton xŏn. Tung la ngiâ, pôa Tô Lâm, Kăn xiâm pơkuâ hnê ngăn Đảng pơkâ thế péa Đảng pơtối mơdêk trâm mâ, mơdêk tơrŭm cheăng trâu hơngế, păng ‘nâng tâ mê nếo ing mâu tơdroăng tơpui tơno khu ƀă tơno tơpui leăng; rak tơrŭm cheăng ƀă tơrŭm a mâu hôp tơpui tơno hên pâ xiâm đảng ki péa Đảng cho ngế tơrŭm.

Tung mê, ai Hneăng hôp mâu Đảng Kŏng san ƀă Kŏng nhân lâp plâi tơnêi; mơnhông hnoăng dêi rêm Đảng xuân môi tiah mâu Khu tơrŭm nhŏng o tung tơdroăng tơpui tơdroăng nếo ai, tơkŭm po mâu tơdroăng trâm mâ mơhno khôi túa lĕm tro, trâm mâ kuăn pơlê vâ pêi pro tâ mê nếo tơdroăng tơrŭm môi tuăn ƀă hlê plĕng dêi pó pơla kuăn pơlê péa tơnêi têa; tŏng gum pơlê pơla mơngế Việt Nam ƀă Phần Lan a rêm kong têa ki rêh, hriâm tâp ƀă pêi cheăng a tíu pêi cheăng.