A roh tơdah, pôa Tô Lâm, Kăn xiâm pơkuâ hnê ngăn Đảng tối môi tuăn ‘na tơrŭm cheăng Việt Nam – Hàn Quốc dế mơnhông mơdêk lĕm tro tung tâi tâng mâu kơvâ; tối rơdêi Hàn Quốc đi đo ối tung khu mâu kong têa ối má môi ‘na mơ’no liăn cheăng, tê mơdró a Việt Nam, ing mê péa tơnêi têa dế tơmiêt troh pơkâ pêi lo liăn tê mơdró châ 150 rơtal dolar a hơnăm 2030; kheăn kơdeăn mâu tơdroăng veăng kum păng ‘nâng dêi mâu khu tê mơdró Hàn Quốc mơ’no liăn tê mơdró a Việt Nam, tung mê ai Grup pơkuâ SK, ing mê kum kal khât tung tơdroăng mơnhông cheăng kâ – rêh ối pơlê pơla Việt Nam.

Pôa Tô Lâm, Kăn xiâm pơkuâ hnê ngăn Đảng pơkâ thế Grup pơkuâ SK tơrŭm krá tơniăn ƀă mâu kơ koan ki tơdjâk ƀă kong pơlê Việt Nam rĕng pêi pro mâu tơdroăng tơkêa bro rĕng má môi, păng ‘nâng ƀă châ tơƀrê. Grup pơkuâ SK pói vâ tơrŭm ƀă peăng Việt Nam pêi pro mâu troăng on tơhrik ki tơdjêp mơnhông mâu kơvâ kơmăi kơmok ki xiâm môi tiah mơ’no liăn pro on tơhrik a Việt Nam tơdjêp mơjiâng mâu tơdroăng tơkêa bro tơrŭm cheăng tơdjâk troh Tíu xiâm ‘noăng chư chêh AI, trếo Hydro ƀă tíu mơjiâng pro on tơhrik Mô-đun kŭn, pêi chiâk deăng xúa kŏng ngê̆ ƀă logistics.