A roh tơdah, Kăn xiâm pơkuâ hnê ngăn Đảng tối, tơdroăng ki ai mâ kơdrâm dêi mâu ngế Việt Nam hriâm tung tơnêi têa ƀă lâp plâi tơnêi mơhno tơdroăng pơtâng hnê tối ki kal: Việt Nam ôh tá xê to ngế ki hriăn plĕng, mê hiăng chiâng môi khu tơrŭm cheăng tuăn ngôa rơkê dêi mâu ngế Việt Nam hriâm. Pôa Tô Lâm, Kăn xiâm pơkuâ hnê ngăn Đảng mơnê pơlê pơla mâu ngế Việt Nam hriâm hiăng mơdoh tá hiâm mơno ăm Việt Nam hên hơnăm hiăng hluâ, mơhno tơdroăng pói vâ mâu ngế rơkê, ngế hriâm plĕng khoa hok pơtối rơtế, ôh tá xê to ƀă hiâm mơno mê tá tuăn ngôa rơkê khoa hok, mơnhên troăng hơlâ kơnôm a tơdroăng cheăng khoa hok, pơchân inhên, kal khât, kô châ pêi pro.

Tơdrêng amê, Kăn xiâm pơkuâ hnê ngăn Đảng pói tơngah ƀă kok tơmeăm mâu tơdroăng hriăn plĕng ‘na Việt Nam kô rế hía rế tơrŭm ƀă mâu tơdroăng dế pơkâ môi tơdroăng ki thâ.

Ƀă tơdroăng pói vâ kân, laga xuân ƀă tuăn mơngúa, đi đo tơmâng, pôa Tô Lâm mơnhên Việt Nam đi đo nhuô̆m tơpui kâ, tơrŭm, nhuô̆m luât lâp plâi tơnêi, mơdêk hên troăng châ tơƀrê, tơdâng tơ’mô vâ mơjiâng môi Việt Nam tơniăn krê, mơ-eăm xêh, pơhlêh nếo tơmiêt pêi rơkê, mơnhông rĕng ƀă krá tơniăn tung chal nếo.