A roh tơdah, pôa Tô Lâm, Kăn xiâm pơkuâ hnê ngăn Đảng kheăn kơdeăn tơdroăng châ tơƀrê tơpui tơno pơla pôa (Phit Hek-sờt) Pete Hegsequath prế pôa Phan Văn Giang, Ngế xiâm pơkuâ gâk kring tơnêi têa Việt Nam, mơnhên tơrŭm gâk kring tơnêi têa pơla péa tơnêi têa hiăng ƀă dế chiâng môi mâu trăng ki xiâm ki kal dêi tơrŭm cheăng pơla péa pâ.

Kăn xiâm pơkuâ hnê ngăn Đảng pói vâ péa pâ pơtối mơdêk tơrŭm gâk kring tơnêi têa păng ‘nâng, ing tơdroăng ki nhuô̆m tơniăn krê, hnoăng pơkuâ, tâi tâng tơnêi tơníu, mâu pơkâ tơpui kâ ƀă kong têa ê ƀă gâk kring tơnêi têa dêi Việt Nam, gum thăm loi tơngah troăng pêi cheăng ton xŏn ƀă gâk kring tơniăn hơniâp lĕm, tơniăn a kơpong.

Péa pâ rơtế môi tuăn, tơdroăng rak tơpui tơno khu râ kăn xiâm ƀă tơpui kâ đi đo pơla mâu kơ koan péa tơnêi têa, ki má lối cho pơla Khu xiâm pơkuâ gâk kring tơnêi têa Việt Nam ƀă Khu xiâm pơkuâ tơdroăng tơplâ dêi kong têa Mih, tơdroăng ki kơnía kal khât tung tơdroăng rak krá tơniăn hiâm mơno loi tơngah ƀă pro trâu hơngế tơ’nôm tơrŭm cheăng ton xŏn pơla Việt Nam ƀă Mih, kum tung hơniâp lĕm, tơniăn, tơrŭm ƀă mơnhông mơdêk a kơpong ƀă lâp plâi tơnêi.