A roh tơdah, pôa Tô Lâm, Kăn xiâm pơkuâ hnê ngăn Đảng kheăn kơdeăn mâu tơdroăng châ tơƀrê tung tơrŭm péa tơnêi têa tung rêm kơvâ cheăng, ƀă hên tơdroăng châ tơƀrê lĕm, tung pơla péa tơnêi têa dế ai hên tơdroăng ki kal khât vâ leh tơbâ 30 hơnăm mơjiâng tơrŭm tơpui kâ ƀă 2 hơnăm tơrŭm khu tơrŭm cheăng ton xŏn tâi tâng.

Tối rơdêi hơnăm 2025 cho hơnăm ki kơnâ kal khât, leh tơbâ 30 hơnăm mơjiâng tơrŭm tơpui kâ ƀă kong têa ê Việt Nam – Mih, pôa Tô Lâm, Kăn xiâm pơkuâ hnê ngăn Đảng pơkâ thế péa pâ pơtối tơrŭm pêi pro châ tơƀrê tơdroăng ki kal, mơdêk mâu roh lăm pôu dêi pó a mâu râ, rơtế mơdêk hơniâp lĕm, tơniăn, tơrŭm ƀă mơnhông a kơpong ƀă lâp plâi tơnêi têa.

Pôa Tô Lâm mơnhên mâu tơdroăng mơ-eăm dêi pôa Marc Knapper, Kăn teăng mâ ƀă khu pú hên kăn ƀô̆, nhân viên Kăn teăng mâ kong têa Mih tung mơdêk, pêi pro châ tơƀrê tơdroăng môi tuăn khu râ kăn xiâm ƀă tơdroăng ki xiâm tơrŭm cheăng tung tơrŭm cheăng ton xŏn tâi tâng Việt Nam – Mih tung rêm kơvâ cheăng kal kí – tơpui kâ ƀă kong têa ê, cheăng kâ – tê mơdró – mơ’no liăn cheăng, gâk kring tơnêi têa – gâk kring tơniăn, tơrŭm tŏng gum mơngế pá puât ƀă rơnêu kế tơmeăm xua tơplâ xâ.