Hâi lơ 20/3, a tíu pêi cheăng Xiâm Đảng, pôa Tô Lâm, Kăn xiâm pơkuâ hnê ngăn Đảng tơdah pôa (Sti-vần Dêi-vit Dêins) Steven David Daines, Kăn kuô̆k hô̆i Mih. A rôh trâm mâ, pôa Tô Lâm, Kăn xiâm pơkuâ hnê ngăn Đảng hâk mơnê pôa Steven David Daines, Kăn kuô̆k hô̆i Mih rôh apoăng lăm pôu Việt Nam, tối rôh lăm pôu ai pơxúa kal khât, veăng mơnhông tơrŭm cheăng kâ pơla Việt Nam - Mih mơnhông tơƀrê tơniăn lĕm,  Kăn xiâm pơkuâ hnê ngăn Đảng tối Mih cho môi tung mau khu tơrŭm cheăng kal má môi dêi Việt Nam, hâk mơnê Kăn kuô̆k hô̆i Mih pơtối mơdêk tơrŭm cheăng ƀă Việt Nam, môi tuăn ƀă Việt Nam “Rơdêi, tơniăn krê, mơnhông dêi tơnêi têa, hơniâp ro kro mơdrŏng”.

Kăn xiâm pơkuâ hnê ngăn Đảng tối nhên, mâu tơdroăng vâ mơnhông pêi lo tơmeăm ai hlâu dêi tơrŭm cheăng pơla péa pâ hlối tối, mê cho; cheăng kâ, tê mơdró ƀă ‘no liăn cheăng kal pơtối tơleăng mơnhên mâu tơdroăng pá puât xua tơplâ, po rơdâ ƀă mơdêk tơrŭm cheăng pơla péa pâ tung mâu kơvâ Mih ai ki rơdêi ƀă Việt Nam kal vâ môi tiah: Khoa hok kŏng ngê̆, pơ’lêh nếo, hriĕn plĕng tơdroăng ki nếo, ‘na on tơhrik  pơkeăng pơlât, pêi chiâk deăng.