Pôa Tô Lâm, Kăn xiâm pơkuâ hnê ngăn Đảng khĕn kơdeăn khât tơdroăng ai pơxúa dêi tơdroăng “Trâm mâ mâu hok tro - sinh viên Việt Nam – Sinuâ ing mâu rơxông’’, cho rôh vâ tối ‘na tơdroăng tơrŭm pơla Việt Nam - Sinuâ, malối tối ‘na hnoăng pêi pro, kơdo mơ-eăm dêi mâu hok tro, sinh viên péa tơnêi têa ing mâu rơxông ƀă tơdroăng mơdêk mâ ngăn mâu tơdroăng vâ pêi pro tung chal nếo mơnhông tơƀrê nếo dêi rêm Đảng, rêm tơnêi têa ƀă tơrŭm péa hdroâng mơngế nhŏng o.

Ƀă ai pơxúa kal mê, pôa Tô Lâm, Kăn xiâm pơkuâ hnê ngăn Đảng tối nhên mâu tơdroăng ƀă mâu droh rơtăm, rơxông nếo péa tơnêi têa tung mê kal hlê plĕng khât ‘na tơdroăng ing nah, ki pơxúa kal ƀă tơdroăng tơrŭm cheăng dêi  Việt Nam - Sinuâ, droh rơtăm péa tơnêi têa hâk tơngăm ƀă ai hnoăng pêi pro tơdjêp, djâ tơrrŭm cheăng péa tơnêi têa mơnhông tâ nếo.

Pakĭng mê, droh rơtăm péa tơnêi têa kal mơ-eăm hriâm, rơnêu pât, mơ-eăm pro xiâm khoa hok kŏng ngê̆ vâ veăng ‘no hnoăng a tơdroăng cheăng ƀă kơmăi kơmok pêi cheăng tiô chal nếo, mơdêk pêi lo tơmeăm ki nếo a tơrêm tơnêi têa, ‘mâi mơnhông tŭm tơdroăng ki tơrŭm pơla péa pâ tơnêi têa.