Xông tơpui mơgêi roh pêi cheăng, pôa Tô Lâm, Kăn xiâm pơkuâ hnê ngăn Đảng kheăn kơdeăn rơkong tơpui tá hiâm mơno, trâu hơngế dêi khu râ kăn pơkuâ hnê ngăn Đảng ủy Khu xiâm tơpui kâ ƀă kong têa ê, Khu xiâm ngăn lêng ‘na kơvâ cheăng Đảng ƀă Đảng ủi Kŏng an Khu xiâm. Kăn xiâm pơkuâ hnê ngăn Đảng mơnhên troăng tơmiât pêi hnê mơhno dêi Đảng ‘na mơdêk tơpui kâ ƀă kong têa ê, mot tơrŭm lâp plâi tơnêi cho hnoăng cheăng ki xiâm ‘’ki xiâm, đi đo’’, tơdrêng amê tối rơdêi ki kal dêi tơrŭm cheăng pá khu ki xiâm: gâk kring tơnêi têa - gâk tơniăn pơlê pơla - tơpui kâ ƀă kong têa ê.

Pôa Tô Lâm, Kăn xiâm pơkuâ hnê ngăn Đảng pơkâ thế Đảng ủi Khu xiâm tơpui kâ ƀă kong têa pơtối tơrŭm krá tơniăn ƀă mâu kơvâ khu xiâm, kơvâ cheăng, kong pơlê tung pêi pro hbrâ xêh, tơdâng tơ’mô, châ tơƀrê mâu hnoăng cheăng tơpui kâ ƀă kong têa ê. Kăn xiâm pơkuâ hnê ngăn Đảng pơchân tối kơvâ tơpui kâ ƀă kong têa ê thế ‘nâi nhên tơdroăng, mơdêk ki dâi lĕm, châ tơƀrê ƀă tơdroăng ki teăm tơdrêng dêi tơdroăng hriăn plĕng, tơbleăng ăm Đảng ƀă Tơnêi têa tung mâu pơkâ pêi cheăng ton xŏn.

Pơkâ tâi tâng kơvâ tơpui kâ ƀă kong têa ê mơnhông hnoăng djâ troăng ahdrối tung mơjiâng tíu hơniâp lĕm, tơniăn hbrâ mơngế pêi cheăng lâp plâi tơnêi vâ pêi pro mâu pơkâ mơnhông tơnêi têa troh hơnăm 2030 ƀă 2045.