A roh tơpui tơno, pôa Tô Lâm, Kăn xiâm pơkuâ hnê ngăn Đảng loi tơngah ing pơkuâ hnê mơhno dêi pôa Keir Starmer, Ngế pro xiâm hnê ngăn kong têa, Ăng-glê kô pơtối mơnhông ó rơdêi, veăng kum hên tung hơniâp lĕm, tơrŭm ƀă mơnhông krá tơniăn tung lâp plâi tơnêi.

Péa ngế kăn xiâm pơkuâ môi tuăn châ pơkâ tơtêk pêi lo liăn tê mơdró pơla péa pâ tâk châ péa xôh tung la ngiâ. Ngế pro xiâm hnê ngăn kong têa Ăng-glê pói vâ Việt Nam môi tuăn mâu tơrŭm cheăng tê mơdró điê̆n tưh, mơdró ‘na liăn ngân tung tơdroăng Khu tơrŭm tâi tâng ƀă Rơkê tơkâ hluâ Thái Bình Dương (CPTPP). Mơgêi Hôp tơpui tơno, péa kăn xiâm pơkuâ hiăng tơbleăng tơdjuôm ‘na tơdroăng péa pâ păng ‘nâng tơrŭm cheăng Việt Nam – Ăng-glê to khu tơrŭm cheăng tâi tâng.