Kăn xiâm pơkuâ hnê ngăn Đảng tối sôk ro hlo tơdroăng rơkê hriăn plĕng, khên tơmiât, khên pêi dêi kuăn pơlê pêi chiâk Việt Nam, veăng ‘no hnoăng mơnhông inâi tơmeăm pê lo ing chiâk dêi tơnêi têa; tối nhên, mơngế kuăn pơlê pêi chiâk kal châ ối a tơdế ki xiâm tung pêi cheăng mơnhông pêi chiâk, thôn pơlê ƀă cho “Ngế lêng ki djâ troăng ahdrối’’ tung tơdroăng rak tơniăn kế kâ.

Kăn xiâm pơkuâ hnê ngăn Đảng pơkâ thế mơnhông xúa khoa hok - kơmăi kơmok tung pêi chiâk, djâ khoa hok troh a klâng chiâk, khu mơdró rơtế ƀă kuăn pơlê pơ’lêh tơdroăng pêi cheăng, pêi lĕm tơƀrê mơdêk xiâm pêi lo tơmeăm, tơniăn krúa lĕm kế kâ, tơmeăm pê lo ƀă pêi tro tiô pơkâ dêi lap plâi tơnêi, vâ mơnhông pêi chiâk deăng tiô túa nếo, krá tơniăn ton.