Pêi pro tiô tơdroăng trâm mâ kuăn pơlê klêi Rôh hôp má 8, Kuô̆k hô̆i hneăng 15, kơxê hâi lơ 2/12 a Hưng Yên, pôa Tô Lâm - Kăn xiâm pơkuâ hnê ngăn Đảng rơtế ƀă mâu kăn Kuô̆k hô̆i kong pơlê lăm trâm mâ kuăn pơlê tung pơlê kong kơdrâm Hưng Yên vâ tơbleăng mâu tơdroăng tơpui a rôh hôp má 8 ƀă hlối tiâ mâu tơdroăng kuăn pơlê kơ-êng pâ thế pơtroh ăm Kuô̆k hô̆i.

Klêi tơmâng kăn teăng mâ Khu kăn Kuô̆k hô̆i kong pơlê Hưng Yên tơbleăng mâu tơdroăng tơpui hên dêi rôh hôp, hên mâu kuăn pơlê tung pơlê kong kơdrâm tối sôk ro Tíu xiâm, Kuô̆k hô̆i, Chin phuh kô pơtối mơdêk xing xoăng mâu ngế cheăng dêi mâu kơ koan Đảng, Tơnêi têa.

Tối mơnhên, kố cho troăng hơlâ ki tro ƀă kô cho tơdroăng ‘mâi pơhlêh iâ mơngế la pêi cheăng tơƀrê dêi khu kăn tơnêi têa, mơdêk pêi tơƀrê mâu tơdroăng dêi mâu kơ koan tơnêi têa, rơtế ƀă kơdroh kơxô̆ mơngế pêi cheăng kâ liăn khế tơnêi têa. Kơdroh kơxô̆ liăn hrê dêi khu cheăng kal kí ing Tíu xiâm troh kong pơlê, veăng ‘no hnoăng mơdêk liăn ngân tơnêi têa ăm ‘na tơdroăng mơnhông ƀă pêi tơdroăng tŏng gum tung rêh ối, pơlê pơla.  

Kơxê tung hâi ki mê, pôa Tô lâm kăn xiâm pơkuâ hnê ngăn Đảng hiăng lăm pôu hbru tơmeăm ăm pôa Mai Văn Vĩnh, 73 hơnăm, ngế tro rong 81%, rơpŏng hngêi mơngế ai hnoăng tơnêi têa tung cheăm Liên Phương ƀă rơpŏng hngêi jâ Bùi Thị Kiêng, kot mâ hơnăm 1940 ối a troăng Bặch Đằng, bêng Minh Khai rơpŏng hngêi xơpá ai hên tơdroăng mơ-eăm mơnhông tung rêh ối.