Tơpui a rôh trâm mâ kuăn pơlê, pôa Tô Lâm, Kăn xiâm pơkuâ hnê ngăn Đảng ăm ‘nâi mâu rơkong pâ thế hnoăng cheăng tung la ngiâ, mê cho: rak vế tơniăn cheăng kal kí, mơnhông rĕng, krá tơniăn tơnêi têa, pơtối mơdêk khât tơdroăng rêh ối dêi kuăn pơlê; kal mơhnhôk ivá rơdêi dêi khu pơkuâ tơdroăng kal kí ƀă tâi tâng kuăn pơlê vâ pêi pro mâu hnoăng cheăng kố.

‘Na mâu tơdroăng tơmiât pêi ki kân dêi pơlê kong kân Hà Nội, pôa Tô Lâm, kăn xiâm pơkuâ hnê ngăn Đảng pơkâ thế pơhlêh nếo túa tơmiât mơnhông, khên tơchĕng-khên pêi-khên chiu pôu râng xua ki pơxúa tơdjuôm. Kăn pơkuâ kong pơlê 2 râ athế rơkê, tơƀrê, achê ƀă kuăn pơlê-xua kuăn pơlê, ƀă tơhrâ pêi pro nhên ăm rêm tơdroăng cheăng ki kuăn pơlê tối.

Kăn xiâm pơkuâ ngăn Đảng loi Đảng ƀô̆, kăn pơkuâ ƀă kuăn pơlê Pơlê kong xiâm kô pơtối mơdêk khôi hmâ rơpâu hơnăm, hiâm mơno tơrŭm, tuăn ngoâ, khên tơnôu, ăm Hà Nội mơnhông rơdêi, tơxâng cho tíu xiâm kân ‘na cheăng kal kí, cheăng kâ, túa lĕm tro, khoa hok, hnê hriâm dêi lâp tơnêi têa.